Дустарин бахшандар
Шаир стха, ви бубадкай пIир хьурай,
Адан тIварцIихъ шегьер хьурай, хуьр хьурай.
Дикъет ая, за лугьун, ваз чир хьурай,
Бейни экуь, вилер нурлу жедайвал,
Шалбуздагъдин кьилел нурар,
Забит Ризванов
Саламрикай чаз дуствилин сел хьурай
(Сажидиназ чар)
Шаир стха, ви бубадкай пIир хьурай,
Адан тIварцIихъ шегьер хьурай, хуьр хьурай.
Дикъет ая, за лугьун, ваз чир хьурай,
Бейни экуь, вилер нурлу жедайвал,
Элдин вилик кьил виневаз къведайвал.
Зи ник, ви багъ, вири санал «чид» хьана,
«Чид» хьуникди бегьерлувал кьит хьана.
Фена хеб-мал, амукьайди фид хьана,
Гьич са затIни аламукьнач арадал,
Фу хьайила, шур хъихьанач суфрадал.
Эменияр гьатна вири залукда,
Кьил акъатнач заемдайни налукдай,
Шаламарни жагъин тийиз алукIдай,
Амукьна чун етимар хьиз рекьерал,
Хажалатрин пехир хьана рикIерал.
Гагь колхозда, гагь совхозда туна чун,
«Фяле» лугьуз беябурна туна чун.
Кьуд патахъай кесибвиле кьуна чун,
Аста- аста аватна гьакI къиметдай,
Къариблухар гьатна элдин кьисметда…
Шаир стха, за лугьудач, вуна лагь,
Инсаф муьрвет жуван рикIе туна, лагь.
КIандатIани хура чуьнгуьр кьуна лагь,
Ви гафарин гъавурда зун акьурай,
Писни- хъсан, дустни- душман акурай.
Къуьлер цазмач Паласайра, Муьшкуьрра,
Лугьуз гьанра уьзуьм багълар туькIуьррай.
КьатIизвайда къенин йикъаз шуькуьррай,
Пакаман югъ гьикI жедатIа низ чида?
Са кас авач рехъ къалана, физ чидай.
Суьруь-суьруь хпер амач гуьнейра,
Кфилдин ван алахьзамач синера,
Кавални лит амач гила къуьнера,
Чекме- голош, шапка, сафутI бул хьана,
Чими тежез гатукайни зул хьана.
Югъ- къандивай артух хьана азарар,
Агал хьана вирт, нек авай базарар.
ЧIем, як такваз, гьикьван неда газарар?
Жегьиларни жегьилзамаз кьуразва,
Дава-дарман тежез, вахтсуз цIаразва.
Шаир стха, за лугьудач, вуна лагь,
ЛугьузватIа, рикIе инсаф туна лагь,
Бубайри хьиз, бармак вилик кьуна лагь,
Эл акьурай ви гафарин метлебда,
Вучиз дидед чIал амачтIа мектебда?
Къуба патан гафар-чIалар туьрк хьана,
Куьре чIала урус чIалан муьрхъ хьана,
Кавалдикай амукьайди кьеркь хьана,
Гьуьрмет квахьай лезгидикай пIир хьанач,
Гьич садазни вичин дувул чир хьанач.
Эпосарни махар рикIел гъаначни?
Дегь девиррин шаирар чахъ хьаначни?
Чи игитри ватандихъ чан ганачни?
Чи мектебра абур рикIел гъун авач,
РикIивайни бегьем тарсар гун авач.
Лагь, газетар, журналар чахъ авани?
Столрални том-том ктаб авани?
Лезгивилин руьгь лезгидихъ галани?
Чи миллетдин эхир кьил бес гьикI хьурай?
Чид такана, гьи касдин чахъ рикI курай?
Шаир стха, на гуьгьуьлар шад ая,
Мурад- метлеб элдихъ галаз сад ая.
КичIе жемир, ягъидин рикI пад ая,
Игит касди чун женгерив агудрай!
Зулуматдин зулумдикай хкудрай.
Ша, чIехидаз - чIехид лугьун датIана.
ГъвечIибрунни хуьн гьуьрметар кьатIана.
«Астахфур!» лагь дин-имандал атана,
Пехилвилер чи рикIерай акъатрай,
Вирибурук садвилин руьгь акатрай!
Иеси жен, ша, чун жуван чилерин,
И дагъларин, и вацIарин, гьуьлерин.
Берекатлу гегьенш- гегьенш чуьллерин,
Чи фу, чи яд гьамишалугъ чав хьурай,
Лезгистандихъ даим экуь цав хьурай!
Югъди- йифди са жув патал кIвалахмир,
Къуншидин гьал агъуз хьунал алахъмир.
Рган тийиз, кьуд патахъни алахьмир,
Жуван хайи халкьдин юкьва бине яхъ,
Камаллувал, гъейрат, намус вине яхъ!
Низ герек туш акьуллудан каламар?
Гьабур тушни чи руьгь патал къелемар?
Шаир стха, кьабула зи саламар.
Къубадани, Куьредани мел хьурай!
Саламрикай чи дуствилин сел хьурай!!!
Къусар шегьер.
Мерд Али
Сажидиназ
(Дуствилин шаржар)
Вун накь вучиз атанач?-
Лугьуз сивел хъвер ала.
Гьевесдалди датIана,
Самбурдал хьиз звер ала.
ххх
Риваят я, дагъ я са
Риваят я, дагъ я са,
Течирбуруз – ягъв я са.
Гьакъикъатда чIаларин,
Дуьзмишнавай багъ я са.
ххх
Накьни, къени
Накьни, къени, пакани,
Ви гъилерал кар ала.
Риваятар кIватI хъийиз,
Чи камалдин пар алай.
Махачкала.
Шихзада Юсуфов
Сажидиназ
Халкьдиз хуш я ви гьар са цIар,
ТIвар авач вахъ «халкьдин шаир».
Белки, вазни лагьана жал,
«Вун накь вучиз атаначир?»
Махачкала.
Майрудин Бабаханов
Сажидиназ
Мад кьве ктаб акъудиз я вун кIвачин,
Сад акъудиз бушвилердай туш хьи на.
Аквар гьалар, къелем тунва вав вичин,
Рекьидайла, урус шаир Пушкина.
Зумрият Жабраилова
СтIал Сулейман туштIани
Сажидин, на яхцIур шиир,
Багъишнава яхцIур рушаз.
Теснифнава пара магьир,
Зар халичаяр хьиз рашаз.
Тикрарзавач са гаф кьведра,
Гьардаз вичин шикил ава.
Гьар садаз са жуьре атир,
Гьар садахъ са гуьгьуьл ава.
ЯхцIур пIузарриз яхцIур ранг,
Язава на кагьул тушиз.
Садбурал на зардин перем,
АлукIзава, лагь на вучиз?
Гьар са рушан кьилел вуна,
АлукIзава къир-валаяр.
ЗакIалда юкь, яргъи кифер,
АлукIзава тик дабанар.
Чи Сулейман туштIани вун,
Са хуьруьнви я вун инсан.
Гьар са шиир, на Сажидин,
Теснифзава пара хъсан.
Пай ава ваз Сулейманан,
Зигьиндикай квачир нукьсан.
Мусаибни амайтIа чи,
Арха жедай чаз лап хъсан.
Заз бегенмиш я ви чIалар,
Мадни гьяркьуь хьуй куь лувар.
Вун акъудиз дагъдин кукIвал,
Зумрията туькIуьрна чIал.
Зумрият Жабраилова
ЧIаларин устад Сажидин
Къелем я ви алмас хци,
Ширинвал гва а ви мецив,
Ийидай межлисар цицIи,
ЧIаларин устад Сажидин.
Гаф авач ваз, я арифдар,
Бажарагълу я пешекар.
Машгьур ийзвай чи халкьар,
ЧIаларин устад Сажидин.
Гьар садакай кьадай хабар,
Гафни кIвалах тир барамбар,
Гвай гафарин чIехи гьамбар,
ЧIаларин устад Сажидин.
Пуд СтIалар са жергеда,
Машгьурбур я кьуд уьлкведа.
Авай шаиррин жергеда,
ЧIаларин устад Сажидин.
Герейханован хуьр.
Абдулкъадир Сайдумов
«Шехьмир, чан Зарина»
СтIалдилай кьве кас чида,
Заз, чи халкьдиз багьа тир.
Сад Сулейман – ЧIехи шаир,
Чи шаиррин буба тир.
Сад Сажидин – жегьил шаир,
Сатырадиз зурба тир.
«Шехьмир, чан Зарина,
Бубади ваз къуьр гъида».-
Гьинай гъида вуна а къуьр?
Ам чуьнуьхна амачир.
Квез герек я кьуру гафар?
Кумада чIатI амачир!
АматIа сад ая хинкIар,
Жувазни неъ, чазни хьурай.
ТукIвадайла, виш грамм хъухъ,
Са тIимил вак газни хьурай!
Серг ва къатухни гьазура,
ТIимил кьван чIем квазни хьурай!
Дуьшперидин дад чидайда,
Вучиз тIуьнач тукIуна къуьр?
Гардан жедай ви лап яцIу,
Къуьрен як нез, хъвайтIа чехир.
Ша, ацукьин куьгьне дустар,
Кеф хукудин лугьуз тостар!
Хъсан затIар мад чида ваз:
Дулмад кIватIни луьле кабаб.
Ни кьуна ви сивевай тIур?
Тухдалди не жуваз кьве къаб!
Илифра чун, мерд хьухь тIимил,
Жеда сувад, жеда суваб!
ТукIукI са верч, я са кулу,
Я кIек тукIукI жуван лулу.
Дустар галаз нен вучиздач?
Ша лагьана, зенг вучиздач?
Гонораррин пул амачни?
Ведомостра къул амачни?
Гьикьван хьурай жугъун кIане?
Нез вергерин хъикьиф къацу.
КIвал амачни, сал амачни?
КIанзавачни хьана яцIу!
Жуван кIвале – жув тамада
Жедайвал, са литри къачу!
Накь къвез хьанач, къе атанва.
Бес къе на чун рахкурдани?
Илиф тавун айиб тушни?
Ван хьайида, акурдани.
«КIватIи-КIватIаш» галаз текдиз,
Уьмуьр гьакIа ракъурдани?
«Шехьмир, чан Зарина»,
Сажидина ваз къуьр гъида.
Шихьмир вун, дуст Сажидин,
Дустуни ваз чехир гъида.
Куьн кIвале мад гъуьр амачтIа,
Ваз за са зирба гъуьр гъида.
Абдулкъадир Сайдумов
Сажидиназ породияр
Театрдин юбилейдиз,
Сажидиназ хабар ганай.
Яхун гардан кьуна цава,
Алашадиз яна пурар,
Чи вар вучиз гатаначир?
Вун накь вучиз атаначир?
КIватI хьанвай чун пара дустар,
Ягъиз мани, лугьуз тостар.
Хъикьифни вверг жугъун кIане
Туна, вучиз атаначир?
ТIамадавай ви гьалар хьиз,
Чи гьаларни лап хъсан тир,
Дулмад кIватIни са виш грамм,
Хъивегьиз куьз атаначир?
Вун накь вучиз атаначир?
Мани лугьуз, ийиз кьуьлер.
Элкъвезвай накь лап чи кьилер,
Алабашни КIватIи-КIватIаш.
Галаз вучиз атаначир?
Вун накь вучиз атаначир?
Ирид авай сомоварар,
Жерге-жерге ийиз чаяр.
Вунни жедай чавай тухвар,
Чай хъваз вучиз атаначир?
Вун накь вучиз атаначир?
Гьар акурла, «О Сайдумов»!-
Лугьузва-мой дом пойдумов»!
Садра кьванни затI аматIа,
Къалура чаз жез тамада!
Ахпа чна лугьудачир,
Вун накь вучиз атаначир?!
Абдулкъаир Сайдумов
Сажидинан межлисда
Зун акурла: «О, Сайдумов,
Гьерекатна дом пойдумов»,-
Лугьуз вун зав рахадай.
Садра кьванни акуначир,
ГьикI жедатIа тIамада.
Эхир са къуз, Аллагь шуькуьр,
Чун ви кIвализ илифна.
Захъ галаз на артистризни:
«Буюр!» - лугьуз теклифна.
Чаз бегенмиш хьана ви кIвал,
Авай лезги къайдаяр.
Асланар хьиз акъвазнавай
Хваш-беш ийиз гадаяр.
Чун суфрадихъ ацукьарна,
Вилик таза шишер кваз.
ИстикIанар галукьарна,
Ви сагълугъдай «вишер» хъваз.
«Лезгинкадал» кьуьл авуна,
На ацукьиз-къарагъиз.
Жирин туп хьиз гадар жезвай,
Шадни тир вун гьарагъиз.
Эверзава на юлдашдиз,
Милиз хъуьрез, рахазвай.
Куьн кьвед фадлай ашукь хьанвай,
Ачкарар хьиз аквазвай.
Ваз тебрикар авуна бул,
«НуькI халадиз» килигна.
Драматургни я лугьудай,
Гьа тIварни вахъ гилигна.
Шииратдин куьнуьяр на,
ВиртIедивди ацIурна.
Сегьнедани чи аялрин,
Сив виртIедив къацIурна.
Кхьихь вуна, яратмиша,
Къемедаяр, махарни.
Юмор гваз хьуй кIвалахдани,
Аялриз гуз тарсарни.
Ви режиссер – Абдулкъадир,
Артистни я, шаирни.
Гьавиляй ваз багъишзава,
Дуст, къе за и шиирни.
Мубаракрай ваз юбилей,
Пара йисар мад хьурай!
Сатирадин верг гвай шаир,
Вун гьамиша шад хьурай! ДаркIуш.
Зумрият Шамсудинова
Сажидиназ
Сажидин, къе цуьк акъудиз дагълариз,
Емиш кьазва багъларавай тарари.
Пудкъад йисан яшар хьанва лагьайла,
Мубаракар ийизва ваз халкьари.
Къе межлисдал кIватIал хьанва жегьилар.
Мадни кIандай чаз вун хьтин агьилар.
Етим Эмин, Сулейман – ви бубуяр,
Вун абурун рехъ тухузвай арха я.
Вав я тур гвач, чукIул гвач атIудай.
Ви къелемди алмасди хьиз атIуда.
Ви гьар са чIал лап дикъетдив кIелайла,
Вилер цив хьиз, валлагь-биллагь, ацIуда.
Шадни я вун, пашманни я исятда.
Вун иналла, хиялар физ яргъариз.
Акурла ваз уьлкведавай гьаларни,
Вун, гьелбетда, физвач йифиз ахвариз.
Сажидин, ви фикирарни дерин я.
Ви къелемдин цIарарни лап къалин я.
Ви фикирар вегьез тахьуй чилерал,
Ви гьар са гаф хьурай халкьдин рикIера!
Агъа СIал къазмаяр
Хатун Алиева
Сажидиназ
Ваз мугьман яз атай дустар,
Им гатфарин сувар я ви.
Чир хьайитIа, ваз Сажидин,
Абур гьар жуьт лувар я ви.
Мягькемдиз яхъ чIаларин тар,
Сулейманан билбилди хьиз!
Гьамишанда акурай чаз,
ЦIувад йисан жегьилди хьиз!
Ваз мубарак ийиз и югъ,
Атанва къе Хатун хала.
Ви манийрихъ, ви чIаларихъ,
Халкьарин хьиз, зи вил гала. Кьасумхуьр.
Шагьабудин Шабатов
Сажидиназ
Ам шаир я, тIурфандизни табий тежез, таб гузвай,
ЧIехиданни гъвечIиданни ихтилатриз яб гузвай.
Мет акъатай шалвардизни мукьуфдивди раб гузвай-
Вичин кьилел кIвалахзавай инсан яз заз чида ам.
Са бязи инсанрив хьтин лавгъа гафар жеч адав,
Зун, зун лугьуз, хур гатадай шаирар гьич къвеч адав,
Вич амай кьван куьтягь тежер гва виртIедин кьеч адав,
Вичин кьилел кIвалахзавай инсан яз заз чида ам.
Акъвазмир вун халкьдин вилик гъилер яна эчIез, дуст,
Къелем мадни хци хъия, зиянкарар къечез, дуст,
Амма са кар тIалабда за са тIимил кьван: кичIез, дуст -
«Вун накь вучиз атаначир?» - лугьуз тахьуй къе чаз, дуст.
Хкай некни серг кьилеллаз хинкIар хьурай хкудай,
Дуст-душмандиз акурай чун, экъечIиз ви къапудай,
Пуд йис хьайи жунгавар чаз герек туш, фей кванариз,
ХьанайтIани пис жедачир, валлагь, дуст, чи чанариз.
Зурба тIуьнар тIалабдач къе, луьле-кабаб, шиш хьурай,
Ваз алахьай гуьлуьшан сар гзаф ваъ, са виш хьуравй.
Кьеж квай вергед хъикьифни хьуй, им бере я гатфарин,
Чир жеда заз ятIа, дуст, вун иеси ви гафарин! ЦIийи Макьар
Балафенди Ферзилаев
Сажидин
Ви чIалара рангар ава,
Цава жедай Яргъирушан.
Чи Къафкъаздин дагълар ава,
Гьам такабур, гьам гуьлуьшан.
Ви чIалара гьунар ава,
Чи Куьредин лезги рушан.
Гуржистандин багълар ава,
Ван ацалтна гьар са къушран.
Зи рикIин дуст, устад я вун,
Куьбечидин заргар хьтин.
Чи Ватандив лап сад я вун,
Самур тамув ачкар хьтин.
Къугъвада ви гъиле къелем,
Пагьливандин пайгар хьтин.
Душманарин акакьдач тIем,
Гераклидин гьунар хьтин.
Ви дережа гьуьндуьр хьурай,
Саиджамал халудин хва!
ЧIаларани Лар дуьр хьурай,
Саидгьасан бубад арха!
Эфендидин михьи рикIиз,
Хуш я гзаф а ви чIалар.
Гатун цикIиз чими рагъ хьиз,
АцIурзавай чилер, цавар!
Агъа СтIал
Гьуьсейн Рамазан
СтIалдаллай Сажидиназ саламар
Кьасумхуьруьн чин - чинаваз гуьнедал,
СтIалрин хуьр ала мягькем бинедал.
Зи тарифар аватда ви ченедал,
Вичи – вичиз жагъурзавай уламар,
СтIалдаллай Сажидиназ саламар.
«Вун накь вучиз атаначир» лугьумир,
Регъуь жедай килимаяр ракъурмир.
Ваз зун гьакьван кIвенкI алачиз акумир.
Къуй гзаф хьуй къелемлухда къелемар,
СтIалдаллай Сажидиназ саламар.
Вун атайла тукIвада ваз ахта кIек,
Чи булахрик чехирдик хьиз кутаз мекв.
Вун хьтинбур гьалтзавач чал, вун я тек.
Сулейманаз илигзавай шаламар,
СтIалдаллай Сажидиназ саламар.
Паб герек туш, илифда чун духандиз,
Зуьрнедин ван куьз герек я мугьмандиз?
Кьиф фенвай зи чIур хьанвай терс чIагъандиз.
Чизвай вичиз динни къанун, каламар,
СтIалдаллай Сажидиназ саламар.
Риваятар рамкаяр хьиз расзава,
Пис ксариз на вижеваз кIасзава.
Ви цIарни бенд анжах гьа ваз хасзава.
Яш жердавай дири жезвай къадамар,
СтIалдаллай Сажидиназ саламар.
Заринадиз къуьр гъиз жедач завай ваз,
Сатирадин сандух къвезва вавай заз.
Бул мисалар къвезвани бес цавай ваз?
За яда ваз чуьнгур гвачиз макьамар,
СтIалдаллай Сажидиназ саламар.
Кьурагь район, Ашахуьр.
Нафисат Агьмедова
Сажидинан 60 йисаз
Ваз хайи югъ мубаракрай,
ГъвечIи хуьруьн чIехи шаир.
Вири элдиз кIани шаир.
Кхьихь гьар къуз цIийи шиир.
ХьанватIани чIарар рехи,
На кIвалахар кьазва чIехи.
Герек туш ваз рахун векъи,
Кхьихь гьар къуз цIийи шиир.
Гьейран я зун ви чIаларал,
Мугьманриз ачух варарал.
Хайи йикъан шад суварал,
Кхьихь гьар къуз цIийи шиир.
Ви чIаларин чIехи луьтке,
Сирнавдаваз шад я уьлкве.
Юбилейдин сагълугъдай къе,
Кхьихь гьар къуз цIийи шиир.
Къизилгуьл тир ви дидед тIвар,
Кагьалвал квач вак гьич са твар.
Машгьур ийиз чи хуьруьн тIвар,
Кхьихь гьар къуз цIийи шиир.
«Вун накь вучиз атаначир?»
Лугьуз вун чаз хьана загьир.
Сулеймана хьтин магьир,
Кхьихь гьар къуз цIийи шиир.
Цавук за гьикI кутан гурар?
Шаирвилин авач гьунар.
Сагъ хьун патал ширин чанар,
Кхьихь гьар къуз цIийи шиир.
Ви чIаларин куьлуь, ири,
Лепейрин гьуьл тахьуй кьери.
Гьар юбилей тухуз дири,
Кхьихь гьар къуз цIийи шиир.
Агъа СтІал
Мегьамед-Насир Агьмедов
Зи дустуниз-Сажидиназ
Пудкъадни цIуд сан юбилей,
Мубарак хьуй, Сажидин ваз.
Гьар са шиир вуна кхьей,
Лап еке савкьват жеда чаз.
Жуьреба-жуьр мярекатрал,
Аквада вун мукьвал-мукьвал.
Шад я зун,дуст, на лугьунал,
Гьар межлисдал кутугай чIал.
Гьар са кIвалах на кьур гъиле,
Намусдивди фида кьиле.
Лезгистанда гьар са кIвале,
Тикрар жезва ви тIвар, дуст, къе.
Неве тирди Сулеймканан
Гьисс авуна фадлай вуна.
Ви дережа жеда кьакьан,
Кутаз ава умуд чна.
Лув гузва къе ви манийри,
Вили цава лифери хьиз.
«ПIинихалум» эркин, хари,
Мугьман жезва чи кIвалериз.
Шаиррикай чи аямдин,
Халкьдиз хуш я, дуст Сажидин.
Лайихлу я лап вини кьилин,
ТIвар гуниз ваз шаирвилин.
Сажидин, вахъ авач шиир,
КIелай чIавуз таъсир тийир.
Инанмиш я ви дуст Насир,
Тирди вун чи халкьдин шаир.
Агъа СтІал.
Света Шабанова
Шаир Сажидиназ
Куьн гьар са затI кIелай инсан,
Жегьил жеда са цIуд йисан.
Шииратдин чирагъ масан,
Экуь хьуй, шаир Сажидин.
Гьар са шиир – са жавагьир,
Чи бицIекриз лап багьа тир,
РикIе авай илгьам атир,
Экуь хьуй, шаир Сажидин.
ЧIехи стха, ваз чухсагъул,
На бицIекриз гузва акьул.
Лезги халкьди ганвай абур,
Экуь хьуй, шаир Сажидин. ЦIийи хуьруьн поселок.
Соня Ибрамхалилова
Шаир Сажидин
Вич бедендиз ятIан яхун,
Сивик жеда ширин рахун.
Бахтлу уьмуьр Аллагьди гун,
Мурад я, шаир Сажидин.
Шаирвилиз пара хъсан,
Хабар тир диндикай инсан,
Гьич са кардик квачир нукьсан,
Устад я, шаир Сажидин.
Чина авай берекат нур,
Вирибуруз я вун машгьр.
Къелемдикай хьунухъал тур,
Лап шад я, шаир Сажидин.
Межлисар акъудиз кьилиз,
Физ гьазур я хуьруьз, кIвализ,
Ви кIвалахар чIалар кIелиз,
Гад я, шаир Сажидин.
Шаир Сажидин муаллим,
Вун СтIалрин язва алим.
Мягькемдиз яхъ вав гвай илим,
Дад я, шаир Сажидин.
Агъа СтIал Къазмаяр.
Султан къурушви
Сажидинан 70 йисаз
Ви нагъмайри шумудни зур,
Авуна зи беден юзур.
Юмор кхьиз даим гьазур,
Мерд кас я вун, дуст Сажидин.
Ахварайни хьана акваз,
КIан хьана заз вавди рахаз.
Сулейманан пай ганва ваз,
Авач инихъ шак, Сажидин..
Гележегда алаз ифин,
КIанда заз вун мад вилик фин.
Маса рекьиз, ша, чун тефин.
Ша, физвайвал фин, Сажидин.
Къе вун нур я гьар лезгидин.
Гуьгьуьл хакажзавай элдин.
Чан сагъ хьурай къе ви ярдин,
Къуллугъзавай, ваз Сажидин.
Мадни гьакьван яшар хьана,
Гъил-кIвач сагъ яз, кIвачел хьана.
КIани яр ви къвалал хьана,
Акурай вун чаз, Сажидин.
Ви таяриз вун стха я,
Ви балайриз вун буба я.
Чаз лезгийриз вун багьа я,
Вун сагъ хьурай, чи Сажидин.
Алай тIварни я арабрин
Мефт сагъ хьурай ви кIарабрин..
ЧIалар авай кас камалрин,
Аллагьди хуьй, вун Сажидин.
Сагъвиливди чан хуьх масан.
Неъ, алукIа, хуьха хизан.
Гьар са кIвалах хьуй ви хъсан,
Яшайишда мад, Сажидин.
Масадбурал вил эцигнач,
Чарадандал гъил эцигнач,
Четинвилиз гьич килигнач
Кар тамамда, на Сажидин.
Ви зегьметар квахьдайди туш.
Вун садрани тахьуй нахуш.
Гьар са югъ ваз хьурай лап хуш.
Вун Аллагьди хуьй, Сажидин.
ХьанатIан вахъ дустни душман,
Садрани вун хьанач пашман.
Гана гьардаз вичин дарман.
Акьул, камал, на Сажидин.
Къеннин йикъал чидачи чаз,
Къе зун Султан мугьман я ваз,
Чун гьамиша хьурай акваз,
Шад жедайвал чун, Сажидин.
Соетский хуьр.
Буба Агьмедов
СтIал Сажидиназ
«Зи Сулейман» лугьуз вуна дамахдив,
Къвалав татаз, ийиз вуна гьараяр;
Сулеймана гатачни вун чумахъдив,
Яргъазна чун, къайила чи араяр?
Сулейманан багъдин цуькни са вун туш,
Цуьквер адахъ ава хьи хейлин самбар.
Бинелу тар бегьер гъуниз нахуш тир,
Лугьумир на ахьтин гафар чаз хкIар.
Расулани «Зи Дагъустан» лагьайвал,
ВунанигьакI «Зи Сулейман» лугьуз хьай.
ТуькIуьрна квез чими утагъ, къулайвал,
Кесиб-юхсул амукьна чун атIай пай.
Завай жедач са жуьрени куьн айиб,
Руьгь девлетдин гьиссер хьайла гужлу куь.
Дагъустандин, Сулейманан жез сагьиб,
Къалуриз хьай куь муьгьуьббпт, рехъ экуь.
Эхь, гьар сада лугьуда «Зи Сулейман»,
Гьахълу я ам вичиз Ватан багьа тир.
Эхь, Сулейман буба я чи виридан,
Эдебдизни гьуьндуьрвилиз буба тир.
Расулазни Дагъустан гьакI кIан хьунай,
Дагъустандиз багъиш авур чIалари;
Сулейманни вав гваз гьакI масан хьунай,
Акъваз тийиз кап яда чи гъилери.
Чухсагъул квез, Сулейман вав акI гувай,
«Зи Дагъустан» лугьунизни маншаллагь!
Аферин квез, камалвилиз къимет гай,
Яргъа жеч чун абурувай, иншаллагь!
Ашар Буба рази хьай вал гьакьван дуьз,
Гъилевай лаш тIурар алаз такурай.
«Зи Сулейман» акъат авур газетдиз,
Чи гъиле мус хьурай, кьазвач хьи кьарай!
Буба Агьмедов
А чIехи тIвар я хьи ваз хас!
(СтIал Сажидиназ бахшзава)
Сулейманан илгьамдикай,
Пай къачувиз викIегь хьай кас.
Кьилин кIарцIел кIвач агакьай,
А чIехи тIвар я хьи ваз хас!
Россиядин писателрин
Членвиле авур кьабул,
Гьар са рекьяй вилик финин,
Тестикь тирла, чIугуна къул.
Фад кутуна кIанзавай цан,
Лежбер тахсир тушиз ерли.
Геж култунал гьатнава ван,
Цазвай тум тир вични михьи.
«Вун накь вучиз атаначир?»
Къе атунихъ вуч хьуй себеб?
Сажидин, ви гунагь квачир,
Келимайрихъ ава метлеб.
Теснифар ви квай чпик кьел,
Халкьдин агьвал хкаж ийиз.
Намус, гъейрат хуьнин рекьел,
Кам къачуниз эвер ийиз.
Ваз чIехи тIвар мубарак хьуй,
Ярар-дустар хьайи чеб шад.
Къелем-хци, къуьруь тахьуй,
Арш гьуьндуьрда хьуй тIеам, дад!
Ашар Буба фад уях хьай,
Эдебият никIе цан цаз.
Бегьер кIватIдай мумкин дагай,
Пехилвили авур яргъаз.
Кьурагь район.
Куьре Фаиз
Сажидинан 70 йисаз
Агакьна чал: «Пудкъадни цIуд
Хьанва» лугьуз тел, Сажидинан.
Вахт чагъин я, ква чи умуд,
Бейтерин вацI – сел, Сажидин.
СтIалрикай стIал-стIал,
Шииратдин эцигиз кIвал,
Пуд СтIалрин кьакьан синтIал,
Ала лайих гел, Сажидин.
Жегьилариз - жегьил я вун,
Агьилариз – агьил я вун.
Межлисра шад гуьгьуьл я вун,
Девирдин кIвенкIвел, Сажидин.
Ризадлайни зирек я вун,
Фигородлай эркек я вун.
«Куьред ярар» дирек я вун.
Гьунар шумуд хел, Сажидин.
Пешейрикай кьазва бандар,
Макъалаяр, тарсар, чIалар.
Тешкилна са шумуд фондар,
Я вун зурба хьел, Сажидин.
МискIинда гуз диндин тарсар,
Муаллим – мектебдин устIар.
Дуьнед кьуд кьиликай хабар,
Жеда ви мецел, Сажидин.
Лезги чилин иер рушар,
ТIвараркай кьаз таза кIунчIар,
Элкъвез-элкъвез кутIуниз цIар,
Машгьурда гъезел, Сажидин.
ПичIид туш Фаизан тариф,
Гьам сатирик я, гьам ариф.
Зи патай ваз гатфар кьикьиф,
Жува кIваха кьел, Сажидин!
Махачкала.
Арбен Къардаш
Сажидиназ ачух чар
Сажидин дах, мубаракрай сувар ваз,
Ви хийирдиз иридра ноль яшар ваз.
Гила жуваз кефер чIугу Куьреда,
Жегьил чIавуз чIугваз тахьай жуьреда.
Герек, пехил жен вал вири жаванар,
Акурла вал элкъведайвал жейранар:
Вуна чIалар атIай рушар – нинияр,
Этерияр, Къветерияр, Къарнияр.
Кьун хьайитIа вирибурун тIварар за,
Мумкин я бес тахьун са тонн чарар за.
Гьикьван ялда? Жувал сагъ чан, жнаб тур,
А дуьньядиз хутахдай хам-кIараб тур.
Салар-багълар на килфетрал илитIа,
Йикъа-йикъа жуваз са къуьр хиритIа.
ЧIехи хьанва ви хтулар – балаяр,
Вахце абрув ни Хиве кьур шапIаяр.
Дустаризни гуда лагьай къуьрер це,
Памидорни афни, ични чуьхвер це.
ПIапIрус чIугу, эрекьни хъухъ, шарабни,
Жез хьайитIа, хкваш жегьил са пабни.
Кайванидиз куьмек жеда, эрк жеда.
Ви чандайни кьуьзуьвилер терг жеда.
КIваликайни мугьмандин кIвач атIумир.
«Вун накь вучиз атаначир?» - лугьумир!
Чка течи зам эцигиз-вахчудай,
РикIни тамир вуна адаз тагудай.
ЧIулав гьерен кьил галудна, шишер ягъ.
Хъвайибурал алава мад вишер ягъ.
Чими мисик ая жуваз ахварар,
ХъуьтIуьзни кваз неъ хъикьифар, афарар.
Къасумхуьруьн рехъ кIвачелай хъийимир,
Махачкала галай патахъ хъфимир.
РикIяй акъуд Лезгистандин районар.
Бес я гатай югар, ялар ругунар.
Хайи хуьре, фена Кпул булахдал,
Ярх хьухь жуваз къацу векьин сумахдал.
Хатадай ви кьилиз цIарар атайтIа,
Физвай садаз багъиш ая гьавайда.
Фекьивилер, мискьивилер бес я ви.
Муаллимвал ва гьакимвал квез я ви?
СтIал хуьре ву пуд лагьай эс, эс я.
Ийиз тахьуй лугьудайвал «Мад бес я!»
Бес я катиз-галтугай кьван, залум кас,
Лезги чилин гьар са пипIе малум кас!
Арифдарри чIугвадайвал кеф чIугу,
Нерин хилез тембек чIугу, эф чIугу.
Памадуррин сал я дуьнья – ваз чида:
Битмиш жеда, дигмиш жеда, китIида.
Сад Аллагьдиз гуда чна жавабар,
Гьисабда чи гунагьарни сувабар.
Азабарни гьисабда Зулжалалди,
Кеферинни сан кьада чи гьалалдин.
Виридалай кефер тIимил хьайитIа,
Мад ада ваз ийидайди ийида.
Вун атайла хабар кьада Худади:
«Вун накь вучиз аначир, бубадин?»
Чилин винел вуна гайи суалдиз,
Маса рангар гуда Цавун Шарвалди.
Кьарай атIай, Сажидин дах, я хвайди!
Къе ви яш я кефер патал дигайди.
Дустар галаз чIугур кеефер бул хьурай,
Гьайиф текъвез харждай кьван вахъ пул хьурай.
Амма авач ахьтин пулар, къизилар,
Акьул - камал ийиз жедай кьезилар.
Бедендин кеф – им терездин са хел я,
Камалдив кеф чIугваз гице эвел яз.
На кьве хелни авун патал барамбар,
Ваз мад йисар гуй Аллагьди са гьамбар!
Махачкала
Абдурагьман Меджидов
Ви камаллу гафар
Ви камаллу гафар авай
Истеклу чар къачуна за.
Ви булахдай гатфар авай,
Шуьрбет дадмиш авуна за.
Квехъ дуьньяда дережа хьуй,
Шагь дагъларихъ чIугур хьтин..
Чахъ къведайла, куьн геж дахьуй,
Кьабулдайвал такур хьтин.
Сардархуьр.
Салаудин Садыки
Давамра жигъир
Инсанрин уьмуьр куьруь шейъ я кьван,
Ни фикирдай икI акъатдайди фад.
ТIимил шиирар кхьейла жуван,
Бес яз гьисабнай, квез герак я мад?
Гур вакъиайри авунай чун перт,
Тарихар чириз, туькьуьмиз илим.
ВУЗ да гьахь тавун тир хьи еке дерт,
Алахънай чун жез духтур, муаллим.
Марксан «Капитал», Энгельсан «Дюринг»,
Партияд тарих, Ленинан цIуд том,
КIелайла, кхьизни тир хьи чун мажбур,
Мурадар вири жерид хьиз тамам.
Тек вун заргардиз хьана, дуст, ухшар,
Жуван заридал чIугвазвай зегьмет.
«Шаир жерид я!» - ТIагьиран гафар
Гьахълубур хьана, - ваз гайи къимет.
Къе вун шаир я - Сулейманан рехъ,
Мягькем кьуна хуьр машгьурзавай кас.
Давамра жигъир, юмордин хуш хъвер,
Вахъ галаз кьазва шаирдин либас.
Вахъ агалкьунар-мурад я рикIин.:
Теснифа дерин шиирар къешенг.
Эмин, Сулейман – шаксуз асланар,
Шииратда вун хьурай са пеленг!
Агъа СтIал –къазмаяр.
Рамазан Дадашев
Фена жал вун Кьасумхуьрел
Зи хуьруьнви, шаир-муаллим,
Диндин рекьяй жегьил алим,
РикIе аваз хуьруьн дерт-гьал,
Фена жал вун Кьасумхуьрел?
КIвачер зирек, гъилер йигин,
Вахт ракъурдач вуна гьакI ви,
Кьарай къвеч ваз са сят кимел,
Фена жал вун Кьасумхуьрел?
Кардик кутун патал мискIин,
Вун къастунал хьана кескин.
Фу тIуьнни гьич текъвез рикIел,
Фена жал вун Кьасумхуьрел?
Сулейман бубадин тарсар,
Кьуна рикIе аваз къастар.
Гъиз алахъиз абур хуьрел,
Фена жал вун Кьасумхуьрел?
ХьанватIани яшар пара,
Руьгьдиз кIубан я куь ара.
ЦIийи шиир рахаз мецел,
Фена жал вун Кьасумхуьрел?
Агъа СтIал.
Салигь Селимов
Сажидиназ
Лугьуда хьи ви пудкъад йис яшар я,
Акваз- такваз акъатна фад, Сажидин.
Ви шиирар жавагьирриз ухшар я,
КIелзавайдан руьгь жеда шад, Сажидин.
Чи межлисрал ви манийрин ван алаз,
Къекъвез ава гьар са кIвале чан алаз,
Лезгистанда са гурмагъдал къван алаз,
Такурай чаз, хьурай абад, Сажидин.
Къе вахъ ахьтин жуьрэт ава дамахдай,
Гьар жуьредин цуьквер кIватIиз яйлахдай.
ЧIехи шаир Сулейманан булахдай,
Хъвана вуна илгьамдин яд, Сажидин.
Ви теснифрин гьар са къадам гурлу я,
Самур вацIуз къведай сел хьиз гужлу я.
Гьар са шаир вичин халкьдиз буржлу я,
Адакай чун жедач азад, Сажидин.
РикIин шадвал. чандин сагъвал гурай ваз,
Гьар камуна хъсанвилер хьурай ваз,
Путулрин мехъерарни акурай ваз,
Гьа им я зи рикIин мурад, Сажидин.
Вахтар- четин, дуьнья алаш-булаш я,
АкI ятIан ви рикI, ви мез дирибаш я,
КIварчагъ Салигь ви къелемдин юлдаш я,
Икрамзавай гьуьрметдив мад, Сажидин.
Салигь Селимов
Дуст Сажидиназ
Ви аманат чар агакьна, рикIин дуст.
Амукьна зун лугьуз вучин-гьикIин, дуст.
Шадвал, хъвер кваз за ваз жаваб кхьизва,
Амма зи рикI,цIук квай ракь хьиз ифизва.
Фикир ийиз заманадкай эйбежер,
Аламатар аквазвайла эх тежер,
Къе гьар садаз, эхь, и дердер залан я.
Алдатмишна, чун кIасайди илан я.
Ада зегьер чукIурна чи уьлкведиз,
Мажбурзава шекер лугьуз сиркедиз.
Пайда хьана гьарамзада-зинеяр,
Терг авуна социализмад бинеяр.
Бада фена халкьди чIугур зегьметар,
Вара-зара авуна чи девлетар.
Им кIуьд йис я, уьлкве кIаняй акъатна,
Марфадикай катна, селдик акатна.
Къе гзафбур кIвал-югъ квахьна ава, дуст.
Санихъайни тежез дарман-дава, дуст.
И мажара ахъайдач за яргъалди,
Гатуз кIевна чун живедин маргъалди.
Фу тIалабиз, яна къуьнуьз гьебеяр,
Артух жезва бейкарбурун жергеяр.
Инсан рекьиз, цIаяр ягъиз кIвалериз,
Мусибатар аквазва чи вилериз.
Миллетвилин рикIив кьуна жизвияр,
Къе Къафкъазда экъичзава ивияр.
Амачиз икI я гьахъ-дуван, адалат,
РикIер кузва чIугвадай кьван хажалат.
Пислик гъизва чи рушарал, вахарал,
Архаиндиз физмач йифиз ахварал.
Гьуьрмет-хатур квахьна халкьдин арадай,
Хци буба кьазва гила чарадай.
Ханлар, беглер акъатнава майдандиз,
ХуртI гуз къекъвез ава кесиб инсандиз.
Абур гижи авунава къе девлетди,
Къазанмишай чарабурун зегьметди.
Эхь, им “Перестройкадин” азар я,
“ЦIийи къайда туькIуьрзвай базар” я.
Привитизациядин чекер гуз,
Шезвай аялдиз хьиз са кIус шекер гуз.
Фикир гайла, аквазвай и крариз,
Са юкъуз рех яда а ви чIарариз.
Шаирдал чан алатIа ам акъваздач,
Гьахъвал ада гьич вичивай яргъаздач.
Зун шаклу туш, йикъар къведа рагъ авай,
Шезвай вилер хъуьреда чи нвагъ авай.
Салигь инанмиш я гьахьтин йикъахъ, дуст,
Гьа югъ къведа, гъалиб жедай чи гьахъ, дуст.
КIварчагърин хуьр
Мислимат Агьмедпашаева
Сажидиназ
Шиирар я гафарни кваз,
Сажидинан рахадай.
Къвазва гевгьер, акваз-такваз,
Адан хурун яхадай.
Чарни къелем жеда гъиле,
Къаткай йифиз мисикни.
Вири кхьиз жезвач гьеле,
Гъалаба ква мецикни.
Сажидинан гафарни кваз,
Шииратдин багъ ятIа?!
Вичин уьмуьр, вичиз течиз,
Муьгьуьббатдин рагъ ятIа?!
Шаир стха, ви чIаларин,
Гьар келима гьуьндуьр хьуй!
Гьар келима ви гафарин,
Ашукьдив гвай чуьнгуьр хьуй!
Ви бейтерин ван хьайила,
РикIе шагьвар къугъвазва.
Ви мерд рикIин михьивал чаз,
Гуьзгуьдай хьиз аквазва.
Кьулан СтIал
Къадир Рамазанов
Мубаракрай
Мубарак хьуй ваз юбилей,
Чаз накь вучиз ша лагьанач?
Гваз къведай зун затI-матI кIваляй,
Са тIимил фад тIа лагьанач?
СтIалар ви чешме яни?
Сулейман ви чешне яни?
Ви тахт къедуст сегьне яни?
На чаз ви сир ма лагьанач?
Куьредал хупI рикI ала ви,
Гъиле элдиз цуьк ава ви,
Дуланажагъ гьикI ава ви?
Намерддиз на хва лагьанач.
Ая элдихъ галайвал на,
Гатут дерт - гъам гатайвал на,
Хьурай ви бахт мадни фараш,
Сулеймана лагьайвал гьа:
“Намус квай бармак” я дадаш.
Хьана даим къени рекьел,
Мердвилелди тIуьна фу - кьел,
Гурлу жервал бейтерин сел,
Хъийимир на ахвардадаш,
ТуькIуьра бул чIалардадаш.
Шаир Къадир атана къе,
Ваз тебрикар лагьана къе,
За рикIивай кьатIана къе,
Лезги халкьдин дамах, дадаш Сажидин.
Куьре патан шаиррив гвай,
Шад манийрин пайдах, дадаш Сажидин,
Инсанвилин къимет чидай,
Гъейрат авай чанахъ, дадаш Сажидин!
Фахрудин Османов
Муаллим, муъмин, Сажидин
Аял вахтар чи виридан четин тир,
Дяведи чаз са экуь югъ къалурнач.
Лазим шартIар, дуланажагъ тахьайла,
Къуват тIимил хьана жизви, Сажидин.
АкьалтIарна школада на кIелун,
Шумуд пеше къачуна а вахтунин?
Эксковатор, гьар жуьре машинар….
МуьтIуьгъарна зегьметдини бахтуни.
КIвалахдивай чара тушиз кIелна на,
ДГУ-дин къачуна на дипломни.
Йисалай-суз дерин хъийи ви чирвал,
Акьул гузва на жегьилриз, Сажидин.
Гунагь квач вак, а мажал ваз хьайид туш.
Хуьрел- кIвалел айиб садран гъайид туш.
Сулейманан дафтар гужлу хъувурди,
Вун я, гьелбет, бажарагълу, Сажидин.
Рехъ хгайла динэгьлийриз законди,
ЭкечIна на вилик хуьре и кардив.
Ваз ийизвай еке гьуьрмет хийирди
Гъана жемят вири сад хьиз, Сажидин.
Чидай ксар ви хцивал, диривал,
Пудкъад йисан яш хьунихъ ви агъадай.
Шииратдин рекье мадни яз жегьил,
Агалкьунар хьурай еке, Сажидин.
МискIиндин кар кьуна гъиле рикIивай,
Чир хьанва ви тIвар динэгьли алимриз.
Кьисметрай ваз виш сан уьмуьр, сагъламвал,
Бажарагълу муаллим, муъмин, Сажидин.
ЦIийи хуьруьн поселок.
Рамазан Межидов
Сулейман буба рикIел алаз
Школада кIелдай чIавуз,
Ви ктаб гваз жедай ялгъуз.
Хуралай чир ийиз гьар къуз,
Ви жавагьирар, Сулейман.
Вуч гафар вахъ авай серес?
КIелунивай гудай гьевес.
Дерин гьуьл хьиз чIалан иес,
Бес туширни вун, Сулейман?
Авачиз ви гъиле къелем,
Акъудиз гаф сивяй мягькем,
ЧIалар авай вахъ лап уьткем,
Алцумиз тежер, Сулейман.
Вуна тариф авур билбил,
Чаз туькIуьрай газет «Билбил»,
Квел зи кьару хьанва кьве вил,
Вун рикIел алаз, Сулейман.
КIелиз къачуз кваз гьерекат,
Ви фондуник хьуй берекат.
Тешкил авур и мярекат,
Сажидин сагърай, Сулейман.
Ви шикилдал алаз кьве вил,
КIел авуна таза «Билбил».
Рамазана адакни гъил,
Кутада, буба Сулейман.
Гьар кьуд патай кIватIиз стIал,
Девлетлу хьуй фондунин кIвал.
Лезгияр, куь паяр гьалал,
Ракъура рикIеллаз Сулейман.
Рамазан Межидов
«Гьарай гуж» шиир кIелайла
Сажидин, на кхьей шиир,
Акьван хъсан хьанвай тукIуьр,
Жегьилар, це куьне фикир,
А чIаларн дад чизвани?
Хтулдиз гузва насигьат,
ЦIийи тир сусаз меслягьат,
Жегьилар, квез жедай регьят,
Кез куьн фидай пад чизвани?
Гафар хкяйнава багьа,
ГьатдатIа абур куьн япа?
Лугьузвайбур сусаз папа,
Жегьилар, квез сад чизвани?
Куьн фикирдиз гъизва кьуд чIал,
КIвал, кал, къвал, тIал.
И гафарин дердини-гьал,
Лугьунин макьсад чизвани?
ЦIийи сусар, ая гуьзет,
Кьуьзуьбурув мийир гьуьжет.
Хуьз хьайитIа гьардан гьуьрмет,
Женнеддавай дад чизвани?
Рамазана гана фикир,
Авуна за и чIал туькIуьр.
Сажидинан чир хьухь къадир,
Чи шаирар мад чизвани?
Ярагъ-къазмаяр.
Гъулан-Герек Ибрагьимова
Сажидиназ тебрикар
Гуьзел юкъуз цуьк акъатай гатфарин,
Майдин вацра вун дуьньядиз атана.
«Бахт кваз хьурай!» - ванер туна гафарин,
Мукьвабуру ваз алхишар лагьана.
Вун бахтлу я, гъед хьиз цавуз акъатай,
Кьунва халкьди багьадаказ вун вине.
Ракъин нур хьиз кIвалин юкьвал аватай,
Ви манияр гьатна гьар садан рикIе.
Сулейманан шаирвилин булахдай,
На хъвана яд-шадарзава къе эллер.
Чи халкьдикай, рушарикай кIвалахдай,
ЧIалар кхьиз секин жезвач ви гъилер.
Шиирарни суьгьбетар ви къалин я,
Гьар са инсан гафаралди чIугвада.
Дустар бул хьуй-вах, стха кьван ширин я,
Дуст-душмандиз далу галаз аквада.
Чил гуьзел я пакаман рагъ акьурлаю
На лугьуди, женнет инал алазва.
Чуни шад я вун мугьман яз акурла,
Ачух рикIни, кьелни фу чахъ авазва.
Гьебе ацIай ширинарни хъуьчIуьк кваз,
Вун илифда кIвализ, хуьруьз датIанна.
Геж атайтIа, мад са дерди вилик кваз,
Лугьудач ваз: «Вун накь вучиз атанач?»
х
Ширин-ширин ихтилатрив эгечIда,
Къадим вахтар рикIел хкиз иердиз.
Ахпа кард хьиз «Лезгинкадик» экечIда,
Шадвал ийиз хайи чилин бегьердиз.
Лезги чилел рикI алай кас датIана,
Къуй садрани вахъ пашманвал тахьурай.
Дкаим гатфар гьахьрай рикIиз атана,
Бахтлувилив ви кIвал гьуьл хьиз ацIурай.
Мубаракрай квез къенин и суварар,
Къуй япара хьурай ван ви манидин.
Гьар са йикъа багъишрай шад хабарар,
Яргъи уьмуьр, сагъ чан хьуй вахъ, Сажидин!
Белидж поселок.
Ризабала Агъабалаев
Мурадар
Ви герояр: мифтехурар, темпелар,
Къачагъри хьиз кьуьрер недай угърияр;
МуркIад рикIер авай бязи хахаяр,
Чара мука кака хадай кукупIар,
Маймунарни, север, сикIер, муьнуьгъар,
Тумуниз гур, течиз гудай буйругъар,
Терг хьанайтIа, тавуна хьиз яргъияр,
Бул хьанайтIа, Сажидинар, Арбенар,
Шииратдин бул жедай чаз ялавар!
Махачкала.
Шамсудин Исаев
Мубаракрай
Темпел дакIан, зарафат кIан устIар яз,
Шаир я вун цуьквед багъда билбил хьиз.
Везин зериф, нагъма назик устад яз,
Фикирарни дерин я ви са гьуьл хьиз.
х
Мецел ала вун Сажидин,
Гьам къардашдин, гьам бажидин.
Мубаракрай и шад межлис,
Кьисмет хъхьуй мад 60 йис.
х
«Жедайлахъди. ша, кеф чIугван, Шамсудин»,-
Лугьуз вуна Кьурагь дагълар раижна.
Сулейманни, Мусаибни, Садыкъи,
х
Чаз кIанзава буба хьана,
Хизанд кьилел сагъ, Сажидин!
Къизилдин къаш- къуба хьана,
Чилин винел рагъ, Сажидин !
Кьурагь.
Исмихан Къадимов
Сажидиназ
Сажидин дуст, кIвачел шалам,
Къуьне кашу, гьебе хьана.
ЭгечIна вун кIватIиз илгьам,
Дагъ галайвал рекье хьана.
Къекъвез-къекъвез яргъал рекье,
Недай къизгъин иштагь хьана.
Гъил физ-хквез гьебед хилел,
Нисини фу куьтягь хьана.
Ала мугьман - чина хуш хъвер,
Гьар кIвале вун илифарна.
Яйлахрилай гъана вергер,
Кьел алахиз хъикьифарна.
Таза ниси, къаймахни шур,
Мазу як квай хинкIар хьана.
Хьанач нямет дадмиш тавур,
Вун гьуьрметрин кукIвал хьана.
Гатфарин хуш атир галай,
Афарарна хъчарикай.
Багъишна ваз риваятар,
Халкьдин милли гафарикай.
Суалар ви гъетер хьтин,
Халкьдин юкьваз нурар хьана.
Мисалар кьаз къветер хьтин,
Лацу чарчел цIарар хьана.
Хайи хуьруьз ахгакьайла,
Ви шаламра тIеквер хьана.
Гьебейравай мисалрикай,
Машгъулатдин цуьквер хьана.
ЦIийи Гъепцегь,
Играмудин Бугьалдинов
Дуст Сажидиназ
Дуст Сажидин, ви шиирар,
Ашкъидивди кIелзва за.
Ви шиирар энгел хьайла,
Аялди хьиз хъелзава за.
Ви шиирар - халкьдин дердер,
КIелиз, ачух жезав рикIер.
Дуьздал акъудзавай фендер,
Гьахьтин хци къелем гва вав.
Сагърай ви чан, кьил ва гъилер,
Лап дерин я рикIин сирер.
Ийизва вал пехилвилер,
Ви шад къамат, ви рикI сагърай.
Гьар газетдиз килигда зун,
Ахъа ийиз вири чинар.
АватIа кваз Сажидинан.
«Билбилдин сес» - шиир цIарар.
Сулейманан мукан шараг,
Вун гафарин язва устад.
Акъваз тийиз кхьихьа мад,
Шиирар ви са-сад, зи дуст!
Ярар-дустар пара я вахъ,
Вахъни, дуст, зи галазва вил.
Играмудин гвай кас я гьахъ,
Саданни хан тийир гуьгьуьл.
ЦIийи хуьруьн поселок.
Январь Гьамидов
Хуш я рикIиз
Пуд СтIалар жергедаваз,
Тамашзава къибле патаз.
Абурукай иллаки заз,
Агъа СтIал хуш я рикIиз.
И хуьр я зи дидед ватан,
Къуй а чилиз хьуй зун къурбанд.
Саяданни Сулейманан,
Хуьр тирвиляй хуш я рикIиз.
Балакъардаш – шаир къардаш,
Мусаиб тир адан юлдаш.
Къурбанд хьунихъ жегьил яз яш,
Сир тирвиляй хуш я рикIиз.
Сулейманан хтул Альдер,
Дуствиликай кхьей бейтер,
Фена рикIе амаз дердер,
ПIир тирвиляй хуш я рикIиз.
СтIал вацI мад жезва дерин,
Сажидинан чIалар ширин.
Муьгьуьббатни лугьун–хъуьруьн,
Загьирвиляй хуш я рикIиз.
ЗакIал гатаз шад мехъерин,
Муьгьуьббатрин гьам сирерин,
Фейзудиназ мад аферин,
Шаирвиляй хуш я рикIиз.
Сулеймана кутур багъди,
Бегьер гузва халкь паталди.
Дамахзава занни квелди,
Хтул яз куьн хуш я рикIиз.
Магьарамдхуьр
Рамазан Межидов
Гьуьрметлу тир Сажидиназ
Пудкъад йис ваз хьанвайла тай,
Уьмуьрди гуй артухан пай.
Ваз юбилей мубаракиз.
Лугьун патал кхьейди я.
Сажидин стха, ваз салам,
Ракъурзава вал кьве калам.
Манадин чIал ятIа тамам,
Жаваб патал кхьейди я.
За кIелзава лезги газет,
Ийизва за гьанай гуьзет.
Ви гафари гайла лезет,
Фикир патал кхьейди я.
Зунни вун хьиз тир муаллим,
ГьикI жеда бес нахуш итим?!
Кухвахьайла жуван илим,
Меслят патал кхьейди я.
Дуьньядал акьалтна азар,
Халкь кашукди хьанва бизар.
Авайвиляй къаннамазар,
Гьабур патал кхьейди я.
Ваз таниш я Лезги газет,
Ийизва за и кар гуьзет.
Жез хьайитIа це заз куьмек,
Чапун патал кхьейди я.
Рамазан Межидов
Ачух хьуй ваз
Сулейманан багъдин билбил,
Ви багълара бул бегьер хьуй.
Шадариз на рикIни гуьгьуьл,
Халкьариз кIандай тегьер хьуй.
Вун акъатай багъдин мукай,
Галаз-галаз мад акъатрай.
Халкьар рази хьана валай,
Лайихлубур къад акъатрай.
Ачух хьана лув гудай рехъ,
Ракъиникай пай хьурай ваз.
Гьалт тавурай чинерук, пехъ,
Лацу лифер тай хьурай вахъ.
Гуьлуьшан яз акваз дуьнья,
Катран хьтин вилер хьуй вахъ.
Садакайни тахьуй мидяй,
Секиндиз фир гелер хьуй вахъ.
Гуьзетиз вач чуьлдин а кьил,
Кул-кусра вахъ душман тахьуй.
Ви сагьиб я акьуллу кьил,
Вун садрани пашман тахьуй.
Четин хьанвай и девирда,
На халкьариз садвал гъурай.
Рамазана веревирдда,
Сефил халкьдиз шадвал гъурай.
Ярагърин хуьр.
Хазран Кьасумов
Дуствилин шарж
ХинкIарни серг, дуьшпере, аш,
Хъсан затIар мад чида ваз.
КIвализ атай мугьманариз,
Риваятар гуз чида ваз.
Эминхуьр.
Шамсият Абукарова
Шаир, сатирик Сажидиназ
Сулейманан нурлу пайдах,
Ви гъилева, ийиз дамах.
Вакай чазни хьана даях,
Мидадда кьаз фад, Сажидин.
Рябетлубур я ви яшар,
Гзаф кIватIай нурлу къашар.
Мугьман я ваз дустар, рушар,
Межлис тхуз шад, Сажидин.
Машаллагь ви викIегьвилиз!
Ви рикI кузва са чирагъ хьиз.
КIандай акваз къизгъин рикIиз,
Дуьнья яз абад, Сажидин.
Гагь хтулриз теснифиз мах,
Безетмишда шииррин багъ.
Вун хизандин кьилел хьуй сагъ,
Уьмуьрди гуз дад, Сажидин.
Берекат квай магьид къелем,
ЧIугуна яхъ гъиле мягькем.
Шад ая чи лезги алеем,
Ктабралди мад, Сажидин.
Мубарак хьуй и мярекат!
Уьмуьрдик кваз хьуй берекат.
КIан тахьана гьич ферекъат,
Кьуд пата тур ад, Сажидин!
ЦIийи хуьруьн поселок.
Зумрият Шамсудинова
Адан кьилел лиф ацукьна
Вили лифре лув гайила ви кьилел,
Ихьтин са чIал атанай гьа зи мецел:
Им пачагь ян хкяйнавай халкьариз,
Къимет гана туькIуьрзавай чIалариз?
ЧIал кхьида вуна руьгьдик акахьдай.
На лугьуда, булахбай хьиз авахьдай.
Къарагъарда дегьне цанин деринар,
Гьар гафунин мана ийиз ширинар.
РикI михьи яз акуна вун а лифрез,
ЧукурайтIан, экъвез, ви кьилел хуьквез.
Зунни мягьел хьана гьа арада,
ЧIал туькIуьриз, гафар туна харада.
Вун - Сажидин, пак рикI авай шаир я.
Михьи рикIин, мезни ширин магьир я.
Къуват гурай ваз СтIалрин чилери.
Ягъиз тахьуй небгетбурун вилери.
Шад жечни бес Зумриятан рикIизни?!
А вун хьтин стхадиз чIал кхьизни.
Вили лифре чархар ядай кьилерал,
Ви тIвар ала чи халкьарин мецерал.
Зумрият Шамсудинова
Сажидиназ
Сажидин, къе цуьк акъудна дагълари,
Емиш гъизва багъларавай тарари.
Пудкъад йисан яшар хьанва лагьайла,
Мубаракар ийизва ваз халкьари.
Къе межлисдал кIватIал хьанва жегьилар,
Мадни кIандай чаз вун хьтин шаирар.
Етим Эмин, Сулейман ви буба я,
Вун абурун рекье авай арха я.
Вав я тур гвач, я маса затI атIудай.
Ви къелемди алмасди хьиз атIуда.
Ви гьар са чIал мана гана кIелайла,
Вилериз нур чикIиз, гуьгьуьл ацIуда.
Шадни я вун, сефилни я, дарихни,
Вун иналла, хиялар физ яргъариз.
Акурла ваз уьлкведавай гьаларни,
Белки физвач ерли йифиз ахвариз.
Сажидинви фикирар лап дерин я.
Ви къелемдин цIарар пара къалин я,
ЧукIурмир ви фагьум-фикир чилерал,
Ви гьар са гаф кьада халкьди кьилерал.
Агъа СтIал къазмаяр.
Наида Рамзанова
Сажидин халудин 75 йисаз
Азиз тир халу Сажидин!
Чан сагъ яз виш йис хьурай ви.
Берекатдив ацIанвай чин,
Ваз юбилей мубаракрай!
Сулейманан рекье авай,
Хци къелем гъиле авай,
Михьи ният рикIе авай,
Ваз хайи югъ мубаракрай!
Гьар са мярекатдин абур,
Инсан я вун авай сабур.
Гьар са кардиз тир такабур,
Ваз къенин югъ мубаракрай!
Ви гьар са гаф, гьар са мисал,
Насигьатрин я са кIватIал.
Кхьиз, чан гъизвай махарал,
Ваз и шад югъ мубаракрай!
Агъа СтIал – азиз Ватан!
Шииратдин я вун дастан.
ЧIехи шаир Сулейманан
Хуьруьн сувар мубаракрай!
Белидж поселок.
Намруддин Аюбов
Сажидиназ
Сулейманан хуьревайди,
Шииратдин биневайди,
Шад межлисрин кьилевайди,
СтIал шаир Сажидин я.
Куьгьне мичкIин туькIуьрайди,
Ана эквер кукIуьрайди,
Бахтлу хизан тешкилайди,
СтIал шаир Сажидин я.
Гьар са хуьре авай дустар,
Манидарриз халис устIар,
РикIевайди зурба къастар,
СтIал шаир Сажидин я.
Гьар са шиир я чеб къаймах,
Серинвал гвай гьамгад булах.
Са зеррени гвачир дамах,
СтIал шаир Сажидин я.
Хуьрер тарих тухузвайди,
Мехъер мани лугьузвайди,
Чухсагъулар къачузвайди,
СтIал шаир Сажидин я.
Пудкъадни цIуд хьанвай яшар,
Вич жегьил са касдиз ухшар,
Гьич са карни тийир нашар,
СтIал шаир Сажидин я.
Агъа СтIал Къазмаяр.
Замир Мегьамедов
Сулейманан мез я Сажидин
Чаз Сулейман кьена лугьуз,
Вилин накъвар шена лугьуз,
Ам рагьметдиз фена лугьуз,
Сулейманан мез я Сажидин.
Чун шагьидар я къе вири,
Чахъ Сулейман ама дири.
Мягькем кьунвай адан ери,
Сулейманан мез я Сажидин.
Лагьана кIанда гьакъикъат,
Къурмишзавай гьар мярекат,
Ачух рикIин бул берекат,
Сулейманан мез я Сажидин.
Умудлу тир хъвер квай сивик,
Шад суварра жеда вилик.
Гьар са хъсан кардин шерик,
Сулейманан мез я Сажидин.
Шаирди чаз тунвай сувар,
Акатнавай вичик лувар,
Шииратдин рекьяй ялвар,
Сулейманан мез я Сажидин.
Замир Мегьамедов
Чи Сажидин дах
Шииррин абур,
Культурадин нур,
Вун я чи дамах,
Чи Сажидин дах!
Ава ваз сабур,
Хач садан хатур.
Виридан даях,
Чи Сажидин дах!
Ийиз мили хъвер,
КIвачерик квай звер,
Къизгъин тир кIвалах,
Чи Сажидин дах!
Куьредив ви тIвар,
Хьанва барамбар.
Гьамиша уях,
Чи Сажидин дах!
Виридаз машгьур,
Куьредин абур,
Я эллерин бахт,
Чи Сажидин дах!
Кхьей гьар шиир,
Устад я магьир.
Къекъвез кIани рехъ,
Чи Садидин дах!
Вини СтIал.
Разият Таибова
Чи СтIалрин хва Сажидин
Пуд СтIалар: Вини СтIал,
Юкьва ава Кьулан СтIал,
Берекатлу Агъа СтIал,
Чи СтIалрин хва Сажидин!
Гьар шегьерда, гьар районда,
Гьар са хуьре, гьар са къайда,
Кимерални рахаз жеда,
Чи СтIалрин хва Сажидин!
Сад Аллагьди багъиш авур,
Цава гъед хьиз нехиш авур,
Шад манияр алхиш авур,
Чи СтIалрин хва Сажидин!
Даим къелем авай гъиле,
Вун шаиррин ава кьиле.
Гьуьрмет авай хуьре-кIвале,
Чи СтIалрин хва Сажидин!
Тешкил авур «Куьред ярар»,
Ачух хьуй ваз бахтун варар.
Авачир ял ядай кьарар,
Чи СтIалрин хва Сажидин!
СтIал вахаз – руш Разият,
Акур чIавуз ви азият,
ЧIал теснифун я хасият,
Чи СтIалрин хва Сажидин!
Кьасумхуьр.
Гуьлмет Ярметов
Сажидин
РикІе хвена гъвечІи-чІехи,
Ви рикІ гьикьван ятІа михьи?
Мадни къелем хьурай хци,
Чи дамах шаир Сажидин.
Гьар келима, гьар са шиир,
Ийидай гьар садаз таъсир,
Квай инсанар са кІус тахсир,
Дуьз рекьел гъидай Сажидин.
Сулейманан тІвар мецеллай,
Алат тийир дуьз рекьелай,
Адан ч1алар гьич рикІелай,
Фин тийир шаир Сажидин.
Дуьз тир рахун хьанвай адет,
РикІ ачух я, мезни шуьрбет.
Сулейманан багъдин девлет,
Артух ийир тар Сажидин.
Агъа СтІал-хуьр тир бине,
Адан ад на кьазва вине.
Чаз-жегьилриз я вун чешне,
Хатурлу инсан Сажидин.
Шииратдин вун сегьнеда,
Шад рахада, шад хъуьреда.
Лезгистанда, гьам Куьреда,
Виридаз к1ан тир Сажидин!
Чуьхверхуьр.
Шаир Сажидиназ
Сажидин дуст, вун ахварай аквазва,
Вун такурла, зи рикІ къене цІаразва.
Вун акурла, руьгь булутра акьазва,
ЦипицІ шараб чи суфрадал алаз хьуй!
Вун шаир я – лампади хьиз экв гузвай,
Халкьдин рикІе, са цук хьиз я вун кузвай.
На рикІериз бахтавар марф къурзава,
Рагъ хьиз чими ви шад хъуьруьн акьаз хьуй!
Зи азиз дуст, вун Куьредин билбил я.
Йисар физва, амма ви руьгь жегьил я.
Шииратдин багъда са къаш, са гуьл я.
Гьар межлисдал тамада хьиз рахаз хьуй!
Яргъал уьмуьр, бахтлу йисар хьурай ваз,
Халкьди шаир-чІехи тир тІвар гурай ваз.
Зун бахтлу я, шиирдаваз ви т1вар кьаз,
Вахъ гьамиша ярар-дустар галаз хьуй!
Назифа Юркъулиева
Чи шаирдиз
ЧІалан устад, Сажмдин дах,
Квел ийизва чна дамах.
Куьн шииррин деринвили,
Гьейранзава чи халкь вири.
Куьн акурла гуьгьуьл шад жез,
Мецел лугьур гафар фад къвез,
АкІ жеда хьи, хъуьтІуьн цикІиз,
Ракъин нурар акурди хьиз!
Жегьилриз дуьз рехъ къалуриз,
Кардин батІул, гьахъ къалуриз,
Хизандани тухуз хасдиз,
Шадвал гузва гьар са касдиз!
КІвачерик звер, сивикни хъвер,
Кваз хьурай ви гьар гьамиша!
Шииратдин багъдин бегьер,
На лугьузва: ша, дадмиша!
Ваз къимет гун кьуна хиве,
Гьатнава зун, валлагь, кІеве.
Тамамрайди и везифа,
Жегьил шаир я Назифа!
ЦІийи хуьруьн поселок
Бесхалум Гьажиева
Шаир Сажидиназ
Экрандилай вун акурла,
Агъ рубашка перем алаз,
Шалбуз дагъ хьиз аквада вун,
Гъиле ручка-къелем аваз.
Аялринни рикІ ала вал,
Ктаб кІелиз аквадайла.
Гьар жуьредин нехишар тваз,
Ктабрихъ ви рахадайла.
Ви шиирар гужлубур хьуй,
Халкьдихъ галаз рахадайла.
Гьерекатар гурлубур хьуй,
Тик гуьнейра къекъведайла.
Сулеймана тІуб хкажна,
Сажидиназ гана эвер.
Тамамариз гайи буйругъ,
КуькІуьрнава нурлу гъетер.
Къекъвезва вун шумуд хуьре,
Ери-бине чирун патал.
Куьре Мелик мярекатди,
Туна чи кьил мадни вине.
Булахдин яд къайиди я,
Чай хъвадайвал чимиз кІандай.
Ви сивевай келимаяр,
Заз тухдалди лугьуз кІандай.
ГьикІ лагьайтІан лайихлу я,
Эй Сажидин, чІехи шаир.
Михьи рикІел къекъведа вун,
Гьар садаз баш ийиз шиир.
А ви кІвачин гел алачир,
Я дагъ амач, я багъ амач.
Сел хьиз физва къе ви уьмуьр,
Ваз ял ядай мажал амач.
Салам гуда вун акурла,
Ви гъил кьазвай гъвечІи, чІехи.
РикІ сагъ я ви, чанни зирек,
Амма са кІус кьил я рехи.
Салам гана хабар кьурла,
Чакай хабар кьада вуна.
Гьар инсандиз рикІин къеняй,
Гьуьрметлу яз тада на пай.
Гьи мярекат хьайитІани
Кьилин устІар я Сажидин!
Пуд булахдай ятар хъвазвай,
Чун ви дустар я, Сажидин!
Тарифуниз лайих я вун,
Дамах гвачир чІехи шаир.
ГъвечІидазни чІехидазни,
Чешне я вун гуьзгуь шаир.
Ви сивевай дилавар мез,
Мадни ачух хьуй, Сажидин.
ЧІехи, чІехи тІвар къачуна,
Мадни артух хьуй, Сажидин!
Зи патай ваз, азиз стха,
Саламдин чар я кІевелай.
Бесхалума - ширин ваха,
Алуддач ви тІвар рикІелай!
Гьа икІ тІимил тир гафарал,
ЧІал туькІуьрна тамам я хьи!
Бесхалуман патай, стха,
РикІин ширин салам я хьи!
Курхуьр.
Диана
Сажидин стхадиз
Вун Сулейманан бахчадин бегьер,
Гьар няниз экъечІ, гваз вацран эквер.
Секинар ийиз гьар садан рикІер,
Гьич гаф авач ваз, шаир Сажидин.
Гьинал хьайитІани ава вун вине,
Галатун ерли кьазвач на хиве.
«Эдебиятдин ким» хьанвай бине,
Гьич гаф авач ваз, шаир Сажидин.
Вун хьтин ксар хьанайтІа, вири,
РикІевай мурад жедай зи дири.
Илгьамдин сирер хас я ваз ири,
Гьич гаф авач ваз, шаир Сажидин.
Сулеймана вав тунва чар-къелем,
Давамар хъийиз адан рехъ уьтквем.
Уьмуьрдин рекьер мадни хьуй мягькем.
Гьич гаф авач ваз, шаир Сажидин.
Женнетдин бахча безетмишна ваз,
Дуьньядин винел вал чан аламаз.
За кхьей чІалар багъишзава ваз,
Гьич гаф авач ваз, шаир Сажидин.
Питид хуьр
ШИИРАТДИН ЯЛАВАР
(Ктабдай)
Гила кьванни акъудайла,
Са шумуд ктаб;
Рази кьванни жедатІа,
Зи критик паб?
ЛЕЗГИСТАН
Къавкъаз тир Албан цІаярин ватан,
Тарих къизилдин цІарарин ватан!
Шагьни Шалбуз дагъ, къадим лезги чІал,
Азадвилин рагъ, чи хуьр, уба, кІвал,
Хуьн патал кІвачел къарагъ, Лезгистан!
Душманрин хура акъваздай мягькем,
Лезги халкь я чун, чи садвал кІани.
Намусдин вилик уьзуьагъ, уьткем,
ЧІехи халкь я чун, азадвал кІани!
Экуь бахтарин нурарин ватан,
Дустариз ачух варарин ватан!
Шарвилидинни Меликан Куьре,
Ярагъидинни Давудан жуьре,
Хуьн патал кІвачел къарагъ, Лезгистан!
Женнетдин макан, дагъларин ватан,
Са стхаяр тир халкьарин ватан,
Сулеймананни Эминан пайдах,
Гъалибвилерин замин тир пайдах,
Хуьн патал кІвачел къарагъ, Лезгистан!
АМУКЬДА ЗИ ЛЕЗГИ ХАЛКЬ
Кьибле, Кефер пад амай кьван,
Лезгистандин ад амай кьван,
Кьилел Аллагь Сад амай кьван,
Зулни гатфар, гад амай кьван,
Чи Земземрин яд амай кьван,
Амукьда зи Лезги халкь!
Касдин чІехи гьуьл амай кьван,
«Лезгинкадин» кьуьл амай кьван,
Дагъни Аран чил амай кьван,
Дуьз кьатІидай кьил амай кьван,
Бедендихъ кьве гъил амай кьван,
Амукьда зи Лезги халкь!
Кьакьан цава рагъ амай кьван,
Шагьни Шалбуз дагъ амай кьван,
Чахъ чи ник, сал, багъ амай кьван,
Гьар са эркек сагъ амай кьван,
Амукьда зи Лезги халкь!
ЛЕЗГИ МАНИ
Заманайрин атІуз мензил,
Гъам-хажалат ийиз кьезил,
Леке квачи михьи къизил,
Сагъ хуьрай вун, лезги мани!
Женгчи аскер азадвилин,
Пак тир мурад абадвилин,
Халис пайдах чи садвилин,
Сагъ хуьрай вун, лезги мани!
Шарвилидин сес я ширин,
Касдин гьуьл я акьул дерин,
Гьам баркалла, гьам аферин,
Сагъ хуьрай вун, лезги мани!
Чи гьар йикъан экуьн варар,
Кьуд патахъди ахъай варар!
Лезгистандал гъизай нурар,
Сагъ хуьрай вун, лезги мани!
Гьар са пата дустар авай,
Билбиларни картар авай,
Берекатлу къастар авай,
Сагъ хуьрай вун, лезги мани!
МЕЛГЬЕМ ГЪИДА МЕККЕДАЙ
Хабар ятІа, зи гьалдикай дустариз?
Е. Эмин
Хабар ятІа, дустариз зи гьалдикай?
Мидаим зи рикІе авай къалдикай,
Къакъат тийир шииратдин тІалдикай
Сагъар хъийиз дерман герек текъведай?
Аллагьди заз, я хъсан, я писвиляй,
Гана и бахт, я шадвиляй, я хъиляй,
Вирибуруз экъисарна зун виляй,
Рекьер-хуьлер артух ийиз къекъведай.
Душман – пехил, халис дустар шад я зал,
Ашукь Инсан цава авай Сад я зал,
Къурзавайди шииратдин гад я зал,
Рагъ хьиз гьар къуз квел кьил чІугваз хквезвай.
Зал алайди халкьдин чан я бахтунин,
Зал тІем алач цІайлапандин вахтунин.
Зун билбил хьиз гуьлчуьмендин тахтунин,
Квез гьар юкъуз жагъида и уьлкведай.
Сажидиназ кІанда Ватан, инсанар,
Заз багъиша кватІа сад-кьве нукьсанар.
Авун патал куьн гьар са кар хъсанар,
Шииратдин мелгьем гъида Меккедай!
***
ЭкъечІдайла рагъ, нур чкІиз цавуз,
Женнет гьуьруьйри манияр лугьуз,
Экуьнин атир багъишдай чІавуз,
Квез и гуьзел тир вахт акваз кІандай!
Чи лезги чилин бахт акваз кІандай!
Хкаж хьайила рагъ кьакьан цавуз,
Варз аквада квез свас хьтин ялгъуз.
Кьакьан тир дагълар, кьил тийир агъуз,
Квез и гуьзел тир вахт акваз кІандай!
Чи лезги чилин бахт акваз кІандай!
Рагъ акІидай вахт алукьай бере,
Цифер рангламиш жеда гьар жуьре.
Самурни Къуба, дамах гвай Куьре,
Квез и гезел тир вахт акваз кІандай!
Чи лезги чилин бахт акваз кІандай!
И пуд чІаван за авуна тариф,
Варз алай йифен гьикІ тийин тариф?
КІанибур патал кьисметнавай йиф,
Квез и гуьзел тир вахт акваз кІандай!
Чи лезги чилин бахт акваз кІандай!
Белки Сажидин рахана гзаф,
Адан хиялар михьибур я саф.
АватІа мажал, аватІа инсаф,
Квез и гуьзел тир вахт акваз кІандай!
Чи лезги чилин бахт акваз кІандай!
ШАРВИЛИДИН НЕВЕЯР Я
Агъзур сарин тарих авай женгинин;
Ватан патал экъич авур ивияр,
Ванцел ашукь азадвилин зенгинин,
Шарвилидин невеяр я лезгияр!
Хайи чилин пагьливан ва пачагь тир,
Пара кьадар авазва чахъ дагъвияр.
Гьич са карни авун тавур гунагь тир,
Шарвилидин невеяр я лезгияр!
Диде чилел, лезги чІалал ашукь тир,
Инсанперес, намус-терез багърияр,
Мугьман патал рикІер даим ачух тир,
Шарвилидин невеяр я лезгияр!
Самурдани, Къубадани, Куьреда,
Авазва чахъ хва-стхадин ерияр.
Садвал кІани и четин тир береда,
Шарвилидин невеяр я лезгияр!
Агъзур сарин мурад-метлеб – сад я чи:
Бахтлубур хьун вири ватанэгьлияр.
И дуьньяда гьатнавайди ад я чи,
Шарвилидин невеяр я лезгияр!
***
Ватандин хва регьят гаф я лугьуниз.
Гьикьван четин я ам кьиле тухуниз?!
Метлеб авач мад кьуьхъди чІугуниз,
Лазим ятІа – чандилайни гъил къачу!!!
***
Уьмуьрдин дад чир жеда чаз эхирдай,
Гьар са легьзе къизилдилай масан тир.
Тух жедач хьи уьмуьр лугьур чехирдай,
Рекьин тийиз хьанайтІа, хупІ хъсан тир!
ЛЕЗГИ ЧІАЛ
Заманайрин атІуз яргъал мензилар,
Вун я дердер авурди чи кьезилар.
Дуьньядал халкь авурди чи несилар,
Сад-Аллагь, сад – вун я, азиз лезги чІал!
Аллагь-Сад я, Диде-Сад я, ЧІални-Сад,
Ватан-Сад я, тІварни-сад я, кІвални-сад.
Чи рикІерин хъверни-сад я, тІални-сад,
Вирт хьиз ширин затІ я мециз, лезги чІал!
Вун-чи рикІ я, вун-чи акьул, мез я чи.
Вун галачиз амай бахтар квез я чи?
Гьам межлисра, гьам женгера-сес я чи,
Галат тийир, гъалатІ тийир, лезги чІал!
Дидеди хьиз чун хайи чІал, хвейи чІал,
Гъалибвиляй гъалибвилихъ гъайи чІал,
Чун гьамиша буржлу я ваз, гужлу чІал,
Гьиссер дерин, сесер ширин, Лезги чІал!
***
Дуст кьаз алахъ гьар са викІегь касдикай,
КичІе тушир кьиникьикай, ясдикай.
Лугьуз жедач, вун кьейитІа женгина,
Вичин хцел ви тІвар хкиз хасдикай.
***
Рагъ алай югъ дакІан инсан садни жеч,
Рагъ авачиз берекатлу гадни жеч.
Марф тахьайтІа, цавал, чилел ядни жеч,
Гьар са кардиз кьадар хьунухь лазим я.
ЭБЕДИ ХЬУЙ
Дуьнья ислягь, дуствал мягькем, берекат,
Пуд затІуни артухарда шадвилер.
Сада садаз гьуьрмет ийиз гьерекат,
АвуртІа чи мягькем жеда садвилер.
Лезгистандин шад манияр, туьнт кьуьлер,
Эбеди хьуй, эбеди хьуй, эбеди!
Авадан хьуй хуьрер, кІвалер, шегьерар,
Дустар галаз бахтлу хьурай зи эллер.
Сад Аллагьди булл гурай чаз бегьерар,
Гьар са карда гьахълу хьурай зи эллер,
Лезгистанда – гур мехъерар, гур кьуьлер,
Эбеди хьуй, эбеди хьуй, эбеди!
Тарих хуьнуьх, ватан хуьнуьх, чил хуьнуьх –
Чаз бубайри веси я тур, зи эллер!
Намус маса гана, жуван кьил хуьнуьх,
Душманрив чаз гуз тун я кІур, зи эллер!
Лезгистандин къизилгуьллер, генг чилер,
Эбеди хьуй, эбеди хьуй, эбеди!
Чи лезги чІал, лезги намус, лезги чил,
Абур пудни чаз багьа я, зи эллер!
Чарадан кІус леке квачир, гуьзгуь чил,
Лезгистандин гьамиша тик тир кьилер,
Эбеди хьуй, эбеди хьуй, эбеди!
ЕТИМ ЭМИН
Вил атIудач дуьньядихъай ширин я.
Е.Эмин.
Гъам-хажалат амаз гьар са дереда,
Дагълар уях жезвай четин береда,
Дуьнья машгьур авур макан Куьреда,
Шаирдин ван тунай Етим Эмина.
Муршидривай къачур илим-Рагъ хьана,
Шииратдин кьакьан тир Шагь-Дагъ хьана,
Гьар са нагъма нямет ширин багъ хьана,
Билбилдин ван тунай Етим Эмина.
РикIин чирагъ куз, ишигъ гуз алемдиз,
Илгьамдин яд ганай шуьше-Къелемдиз.
Чан къурбандиз муьгьуьббатдин мелгьемдиз,
Къизилдин ван тунай Етим Эмина.
Дагъ хьиз хура акъвазна цIун-вацIарин,
Хъуьренай ам чIавал Тумакь яцарин,
ЦIуруриз мефт, ишигъ вилин лацарин,
Асирдин ван тунай Етим Эмина.
Багъри элдихъ рикI тIаз эхир нефесдал,
Жавагьиррин таж теснифнай гьевесдал.
Гьар са шиир алцумиз дуьз терездал,
Несилдин ван тунай Етим Эмина.
Зун-Сажидин-ви Багъдин са серин тир,
Ашукь кас я ви Пак тIварцIел ширин тир.
Гьар келима метлеб жегьет дерин тир,
Магьирдин ван тунай Етим Эмин.
ЧАЗ ВУЧ КІАН Я
Чаз вуч кІан я?
Анжах са кар –
Ислягьвал чи аялриз,
Фирягьвал чи хиялриз!
Чи чил,
Чи гьуьл –
Аллагьди чаз багъишай!
Чаз вуч кІан я?
Анжах са кар –
Чи садвал,
Чи азадвал.
Жуван хайи къвакъвад вал.
Чи кІвал,
Чи мал,
Аллагьди чаз багъишай!
Я лезгияр,
Чаз ихтияр авачни?
Жуван гьалал,
Дидед чІалал,
КичІе тушиз рахадай,
Дерди-бала,
Халу, хала,
Ярар-дустар аквадай?
Итимар яз,
Етимар хьиз,
Квез я къекъуьн накьварал?!
Дагълар – чибур,
Багълар – чибур!
Сергьят кІевиз ракьарал!
Хъуьрез стха-вахарал!
Чаз вуч кІан я?
Ислягьвал чи несилдин!
Я дяве туш,
Я деве туш,
Пурар алай къизилдин.
Чаз чи тарих,
Чи пак къилих,
Дуствал дерин,
Сесер ширин билбилдин!
Къарагъ, зи халкь!
Гъиле кьуна
Чирагъ, зи халкь!
Квез я тІуьр фу,
Алаз тфу?
Лезгистандин,
Гуьлуьстандин багъ аваз!
Чина чими,
Цавун гими – рагъ ама!
Шарвилидин.
Пак ивидин,
Шагьни Шалбуз – Дагъ амаз!
***
Душманар – негь, дустариз экв куькІуьрдай,
Захъ кІвал ава,
Захъ чІал ава лезгидин.
Душман – инкар, дустарин кар туькІуьрдай,
Захъ мез ава,
Захъ сес ава гуьзгуьдин!
СТІАЛАР
Сад Аллагьди, Дагъни Аран уьлкве тир,
Багъишна заз зи Лезгистан еке тир.
Ана ава Шииратдин Мекке тир,
Агъа-Вини-, Кьулан-, багьа СтІалар!
Сад Дидеди Къадим лезги чІал гана,
Хайи хуьре гуьрчег Музей – КІвал гана,
Пуд СтІал хуьр, ацукьнавай къвал гана,
Агъа-Вини-, Кьулан-, багьа СтІалар!
Сад Сулейман, Садни Эмин, Сад Гьасан,
Шаирвилин рекьел гъайи пуд Инсан,
Заз багьа я лезги хуьрер, зи масан,
Агъа-Вини-, Кьулан-, багьа СтІалар!
АД ЖЕДА
Лацу шегьер, КІеледин хев,
Шалбуз дагъ,
Шагьидар я эбеди яз кьилел рагъ.
Шарвилини адан несил сагъ я, сагъ!
Абур хьана, абур ава, мад жеда!
Лезгистандихъ мадни зурба ад жеда!
Диде Чили Шарвилидиз хур гана,
Лезги халкьди адан гъиле тур гана,
Вили цава цІайлапанди нур гана,
Чапхунчияр яд хьана ва яд жеда!
Лезгистандихъ мадни зурба ад жеда!
Магьаммед ал-Ярагъияр, Эминар,
Сулейманар – я чи халкьдин заминар!
Гьикьван чна лагьайтІани Аминар!
Женг чІугуна авур кІвалах фад жеда!
Лезгистандихъ мадни зурба ад жеда!
Лезги чилел Шарвилидин ван ала!
Чи дагъларал рекьин тийир чан ала!
Халкь кьве патал авурбурал къан ала!
Эхи Самур себеб яз чун сад жеда!
Лезгистандихъ мадни зурба ад жеда!
Игитвилин гьисс хкажиз цавариз,
Чи гьар са югъ тешпигь ийин сувариз!
Шарвилидин къуватар гуз лувариз,
Дагъдин Лекьер вири санал кІватІ жеда!
Лезгистандихъ мадни зурба ад жеда!
ЖЕДАЙДИ СА ГЬАРАЙ ТИР
Гьич садазни чидач кьилел къведайди,
Чир хьанайтІа, къал-макъал тир жедайди.
Гьарам девлет шехьиз-шехьиз недайди,
И дуьньядал жедайди са гьарай тир.
Ажеб хьана кьисметдин гел гьал тежез,
Са бязибур элуькьзава лал тежез.
КІватІай девлет къияматдин мал тежез,
И дуьньядал жедайди са гьарай тир.
Акьуллубур кІан ятІа хьун аялар,
Гьич садахъни тахьуй чІуру хиялар.
Гунагькарар рекьидайла жез ялар,
И дуьньядал жедайди са гьарай тир.
Къанихвилин муьрхъ ягъайтІа рикІериз,
Хъач акьалтда халкь къекъведай рекьериз.
Къалгъанрин тум вегьена хьуй никIериз,
И дуьньядал жедайди са гьарай тир.
Сажидиназ чидай вацІал цІай ийиз,
Ам вердиш я эверайдаз гьай ийиз.
АлахъайтІа зун ахмакьрин тай ийиз,
И дуьньядал жедайди са гьарай тир.
***
Лугьуз жедач уьмуьрдин шив,
Кек галкІана алукьайтІа.
Азраилди агална сив,
Ажалдин дерт галукьайтІа,
Зи сурал къвез манияр лагь!
***
Сад Ватандиз буржлу я зун хайи тир,
Лезгистандин Дагъни Аран багъишай.
Къуьлуьн фуни чар булахар къайи тир,
Абулейсан марф хьиз цавай иличай.
Зун дидедин кумуьзава буржуник,
Зал чан гъана, багъиш авур лезги чІал.
Жуван хивез еке буржар къачуник,
Кутаз туна вуна гьар къуз, гуьзгуь чІал.
Эхиримжи буржни пара залан тир,
Шииратдин вилик даим есир я.
Буржар вири алудун зи план тир,
Алакь тавун зи кьисметдин тахсир я.
ДИДЕДИН СУЬРЕТ
Вахтар физва чун жез чІехи,
Са девирда аялар тир.
Азиз диде, кьил тир рехи,
Чун ви рикІин хиялар тир.
Къе заз а ви гуьзел суьрет,
Лув гуз физвай циферикай,
Малаикрин галаз кІеретІ,
Карагзава лиферикай.
И дуьньядин гьар са нямет,
Ваз кІандай чаз хьана, диде.
Вун себеб яз бахтлу кьисмет,
Заз Аллагьди гана, Диде.
Диде, диде, ширин диде,
Мез вирт, акьул дерин диде!
Вил галама акунихъ мад,
Ви милаим хъуьруьн, диде.
Диде-Сад я, Сад я Аллагь1
Диде-багьа касс я, Валлагь1
Лугьузва заз даим рикІи,
Дидедикай манияр лагь!.
АЛПАНДИН ЦІАЙ
РикІ пердеда, перди хурун кьефесда,
Секин жезвач уьмуьр амай кьадарда.
Вучиз зи рикІ гьатнаватІа гьевесда?
Вуч кІан ятІа адаз завай и дарда?
Я йиф авач, я югъ авач, кІвалах я.
Вучин на вун, я азиз рикІ, кукІварда?
На лугьун рикІ ивидин са булах я,
Алпандин цІай твазва гьар са дамарда.
Ам цІайлапан ятІа яраб цаварин?
Сад Аллагьди Къавкъаз дагъдал рекье тур.
Алран къадим аллагь ятІа суварин?
Ам кьуьл ятІа туьнт «Лезгинка» рикІе тур?
Суалри зун гьелекзава, рекьизва!
Заз жуван рикІ хуьз кІанзава саламат
Шагь-Дагъдин кІукІ хажалатрив рекъизва,
Чи секинвал акула жез аламат
Лезгияр жен – дуьньяда тІвар-ван авай!
Гьич садахъни чилер авач чахъ хътин.
Рекьин тийир Шарвилидин чан хьтин,
Гьич садазни эллер авач чахъ хьтин!
Аранни Дагъ, ава Касдин гьуьлни кваз!
Себеб ятар Земземар тир Алпандин.
Берекатрин Женнет я чи чилни кваз,
Вил алукьиз тахьурай агъабандин!
Куьр вацІ вуч я – чІехи стха Самурдин!
Кьурагь дагълар, Куьре – аран, Ахцегьар –
Лацу шегьер-имарат са абурдин!
Квел шумудан хъфизматша темягьар?
Алпандин цІай къугъвазва чи дамарра,
Хкахь тийиз, сел акьалтиз Самурдал!
Шарвилидин шив амазма чамарда,
Иес вилив хуьзва ада сабурдал.
Чаз къурху туш цІаярикай, - цІая я чун!
Чи рикІериа азадвилин сел ава!
Мугьман патал эверайдаз – гьай я чун!
Шад кьуьлерин мехъер ава, мел ава!
ЦІу-чим гуда, цІа чрада, цІу-куда!
ЦІун къативал аслу я гьар рикІелай.
Эй Сад Аллагь, лезги халкь ви агуда!
Алудмир чун азадвилин рекьелай!
Сажидинахъ дердер, гъамар мад ава,
Кьве патал пай авур лезги эл акваз.
Вахъ-Алпан цІай къизмишардай чад ава,
Гьикьван сабур кьан Ватандин шел акваз?!
***
Гьайиф чарар чІулав авур цІарарал!
Гьайиф чІарар рехи авур крарал!
Гьайиф! Гьайиф! Ватан патал чан гайи,
ЧІур акьалтиз къегьриманрин сурарал!
ЯЛВАР
Хуш я лугьуз ярар-дустар, межлисар,
Зав хъел хьана кьве чин алай иблисар.
Гунагьар каз кьуртІа завай силисар,
Къуй, зи дуван авурай Сад Аллагьди!
Халкьдин рекье кузва лугьуз цІукІ хьана,
Хаинриз зи кІан я таран кІукІ хьана.
Уьмуьр тухвай муьгьуьббатдин лукІ хьана,
Къуй, залай гъил къачурай Сад Аллагьди!
Агъдин лацу ранг кьадалди чуруди,
Гьич са карни авунач за чІуруди.
Халкьдиз багъиш ганачтІа рикІ хуруди,
Къуй, зи тахсир авурай Сад Аллагьди!
РикІе авай мурадрин дагъ кьакьан тир,
Дережа зи, шукур Аллагь, юкьван тир,
Зун зи халкьдин къавук квай са чукьван тир,
Къуй, зи зегьмет акурай Сад Аллагьдиз!
Зи уьмуьрдал шадни я зун, сефилни.
Яшар пара, агьилни я, жегьилни.
Руьгь девлетлу шаирни я, саилни,
Къуй, маса рехъ тагурай Сад Аллагьди!
Захъ авайди кьве гъил, са кьил, мез я зи.
Халкь кесиб яз кІватІай девлет квез я зи?
Ватан патал къуллугъ авун ферз я зи,
Къуй, дуьз рекьяй ракъуруй Сад Аллагьди!
Лезги чилин ширин я заз булахар,
Диде чилихъ гелкъуьн я зи кІвалахар.
Жуван халкьдал ийизва за дамахар,
Къуй, шад уьмуьр хугурай Сад Аллагьди!
Эмина хьиз чІалар лугьуз рикІевай,
Сажидин я Сулейманан рекьевай.
Дуьзвал, гьахъвал патал даим йикьевай,
Къуй, руьгь Вичел чІугурай Сад Аллагьди!
КIАНДАЙ
Гагь варз кьилел, рагь рагъ кьилел,
Акун – са бахт тушни чилел?
И дуьньядин гуьзелвилел,
Ашукь жедай вилер кIандай!
Авур гьуьрмет тийиз къуьхуьн,
Сада-садан хатурар хуьн.
Жегьилвилин ялав туьхуьн
Тийир къизил гуьллер кIандай!
Аквазвай са сефер вилиз,
Къуллугъ ийин Диде чилиз.
Шадвалдайвал кьиляй-кьилиз,
Мехъерарни мелер кIандай!
Дуьнья гуьзел ятIа гьикьван!
Гъетериз куьн тамаш кьакьан!
Сад Аллагьдин Тахтуниз кьван,
Хкаж жедай цIлер кIандай!
Дуьньядикай вил атIудач,
ВацI атана, гьуьл ацIудач.
Шад манидин зил атIудач,
Муьгьуьббатдин чуьллер кIандай!
Инсанрин шад ийиз гьалар,
Теснифин, дуст, цIийи чIалар.
Сажидинан рикIин тIалар,
Кьезилардай эллер кIандай!
ЗИ ЛЕЗГИ ХАЛКЬ
Зи лезги халкь, терездин кьве хилевай,
Вун як яни кьасабчидин гъилевай?
Гьакимрилай аслу хьана кьилевай,
Кьадар-кьисмет, хъиляй хьиз вай-зай авур?
Са стхаяр – сад диде, са бубадин,
Акъвазарна къаравулар арада;
Мелни мехъер са хьуьруьн, са убадин,
Лагь, вучиз чIур ийизватIа чара?
Зи лезги халкь, цIигел хьанвай садвилихъ,
Ви арада вучиз Кьулан вацI хьана?
Сефилвални акахьна чи шадвилик,
РикIерал чи алат тийир кьацI хьана.
Ша, Лезгияр! Женгерани мелера,
Сад жен вири, мурад пата леке тир.
Шад мехъерар къурмишин чи кIвалера-
Лезгистанда! –Къагьриманрин уьлкве тир!
Сагъ хьурай халкь – зи эвел, зи гележег!-
Лугьузва за – Сажидина стIалви.
Халкь паталди чIугвада за даим женг,
Багьавиляй гьар са къван, са ккIал ви!
КУЬРЕ
Кьурагь дагълар. Самур, Аран,
Бегьерар я Лезги таран.
Къурмишзавай сувар Яран,
Муьгьуьббатдин рагъ я Куьре!
Куьре Мелик, ПІирер Шагьид,
Мегьаммед я ЧІехи Муршид.
Етим Эмин, Кьуьчхуьр Саид,
Сулейман са дагъ я Куьре!
Кьурагь, Ярагъ, чи Кьасумхуьр,
Чирагъар я даим куькІуьр.
Сад Аллагьди авур туькІуьр,
Женнетдин Пак багъ я Куьре!
Сажидина лагьай бейтер,
Чиле – цуьквер, цава – гъетер,
Чир хьана заз а ви къейдер,
Намус михьи агъ я Куьре!
Куьредин нур, Куьредин рагъ,
Лезги чилин берекат я.
Дуьнья машгьур Шагь, Шалбуз-Дагъ,
Чи иман, чи – тарикъат я!
Лезги хуьрер – дерин сирер,
Гьар са хуьр – са Шагь я, Куьре!
Чи дагъларал хьайи хирер –
Чи намус, чи – ягь я, Куьре!
ЖАГЪАНАЧ ЗАЗ РЕГЬЯТДИЗ
Гьич са карни жагъанач заз регьятдиз.
Кьисмет патал даим кукІун-чухун я.
Бахтуни вич къалурна заз кьегьятдиз, Белки гьа кар себеб яз зун ягъун я.
Шаирвили сагъарна зи азарар,
Адан руьгьди хкажна зун цавариз.
Ашкъидин цІу канатІани пІузарар,
Зегьметди заз багъиш гана суварар.
Хари гада хьанач, кІвале кьвед авай.
Зи аялвал хъендик хьана дяведин.
Пилоткадал ятІан ашукь гъед авай,
Язух къвезва гьар са кьейи неведин.
Лагьанач за са кІвалахни четин я,
Уьмуьр жузван тухвана заз кІанивал.
Мурадрин дагъ, шукур Аллагь буьтуьн я,
Рази я зун кьисметди заз гайивал!
ЧИ СТІАЛ ВАЦІ
Дагълар хъуьрез, живер цІараз,
Авахьда вун синер кьураз.
Гьар гатфариз, гьар са Яраз,
Мани яда, хунча храз,
Ширин ванцел, чан СтІал вацІ!
Кьулухъ туна Магъу дере,
Дустар кьада гьар са хуьре.
Жув паталди гьич са зерре,
Темягь тийир Земзем шире,
Вал шад я эл, чан СтІал вацІ!
Суваб кІвалах я дуьз рахун,
Гагь куьк жеда, гагь вун яхун.
Чарх акурла ийиз кухун,
Гагь-гагь жеда вакай ахун,
Атайла сел, чан СтІал вацІ!
Мублагь тир кьер жеда ваз дар,
Муькъвер тухуз, гваз физ бандар.
ТипІигъ, АрхитІ, мад Алкьвадар,
Акур чІавуз ви мукьвадар,
Хкатда хъел, чан СтІал вацІ!
Багъни бустан, дигиз никІер,
Шадарда гьар садан рикІер.
Гьар са къанал яз ви сенгер,
ВацІ – зегьметчи, чи рикІ-жигер,
Мехъерни мел, чан СтІал вацІ!
Кьурагь-Арагъ вацІ яз уртах,
ЧІугвада вун Арал патахъ.
Галат тийиз фидайла яхъ,
Шумудав на кьада кьуршах?
Галаз мад хел, чан СтІал вацІ!
Мугъу дере, Мамрач, Каспи,
Халкьдиз яд гун я ви кеспи.
Гагь рагъул жез, гагь вун аби,
Векьер-къацу, никІер хъпи,
Жеда ви цел, Чан СтІал вацІ!
Сажидиназ чида къадир,
Ваз ухшарбур жеда надир.
ЧкІуриз кьуд патахъ атир,
Куьревийрин ви тІвар шад тир,
Ала мецел, чан СтІал вацІ!
БУБАДИН ТАРСАР
Гатайдаз на рак, кар гьатна кІеве,
Куьмек гунин бур гьатзава хиве.
Эверайдаз – гьай, суалдиз жаваб,
Дуьздаказ гунуг – кІвалах я суваб!
Мукьвадахъ галаз – мукьад яз къунши
Кьур касдиз четин кар жедач наши.
Халкьдиз куьмек гуз экъечІай гъилиз,
ИчІи къаб кьуна, хкведач кІвализ!
***
Ламра ягъайла хатадай кІуру,
Аватна лугьуз женнетдиз инсан;
Гьар акур ламраз са бязибуру,
Кьисмет хьун патал гележег хъсан,
Вич ягъун патал кхьизва хуру.
***
Келледа акьул авайда дерин,
ТуькІуьрда кІвалах мецелди ширин.
Кьабулда вун хуш мугьман хьиз азиз,
Я чинебан сир акъуддач къециз!
ЯЦІУ ХЬАНА ЧУН
Пешерин къаца,
Къацу хьана чун!
Цуькверин лаца,
Лацу хьана чун!
Тарарин яцІа,
ЯцІу хьана чун!
Ракъин нурари,
Суьзмишарна чун!
РикІин цІаяри,
Къизмишарна чун!
Ватан хуьн патал,
Дигмишарна чун!
Дяве фидайла,
Аялар тир чун.
Гъалиб жедайла,
Хиялар тир чун!
КІвал-югъ хьайила,
Кьегьалар тир чун!
Гьунаррин яцІа,
Лигим хьана чун!
Кьисметдин вацІа,
Лазим хьана чун.
Кун тийидай цІа,
Илим хьана чун!
Несилар патал,
Чешне хьана чун!
Шад къугъун патал,
Сегьне хьана чун!
Камалрин кІватІал-
Дегьне хьана чун!
Пешерин къаца-
Къацу хьана чун!
Цуькверин лаца,
Лацу хьана чун!
Тарарин яцІа,
ЯцІу хьана чун!
КЪАДИМ КЪАФКЪАЗ
Къадим Къафкъаз – макан азад лекьерин!
Ни сан гуда ви женгерин рекьерин?
Камаллу тир Шалбуз пIирер – шейхерин!
Вун дуьньядин юкь я къизил, женнет я!
Кьве лув – кьве гьуьл6 сад Кас тир, сад ЧIулав тир,
Азербайжан – цIун мурцарин ялав тир,
Зи Дагъустан – туруналлай къилав тир,
Вун дуьньядин юкь я къизил, женнет я!
Къадим Къафкъаз – гьар са къван са къизил тир,
Земзем ятар, гьава авай кьезил тир,
Дуствилерин рикIериз хуш мензил тир,
Вун дуьньядин юкь я къизил, женнет я!
Куругълидин, Шарвилидин турарив,
Шумуд душман тергнай вуна варарив?
Чир-цав ишигълаван ийир нурарив,
Вун дуьньядин юкь я къизил, женнет я!
Къадим Къафкъаз – кьеб тир инсаниятрин,
Вун чешме я гьар са михьи ниятрин.
Къурьан хьтин Сад Аллагьдин аятрин,
Вун дуьньядин юкь я къизил, женнет я!
Эминанни Низамидин дастан тир,
Берекатрин никIер, багъни бустан тир,
Диде – Сад яз, пагьливанрин Ватан тир,
Вун дуьньядин юкь я къизил, женнет я!
Шагь-Дагъдилай къарагъай гар – зар хьана,
Кьуд патахъди чукIурайди яр хьана!
Сажидинан чIал-саламдин чар хьана.
Вун дуьньядин юкь я къизил, женнет я!
ГЬАБИБ СТХА
Кьве сеферда боксдай дуьньядин хьайи
Аллахвердиеваз бахш яз
Къурушрин хуьр – цавук гурар,
Шалбуздагъдин кьилел нурар,
Дуьньядин чемпионвилин,
Четин рекьяй боксервилин,
Кьведра къалур авур гьунар,
Чи лезги хва – Гьабиб стха!
Хтанва яз гъалиб, стха!
Лезги халкьдихъ Шарвилияр,
Хьайид я викIегь эгьлияр.
Амма кьведра чемпион тIвар,
Къазанмишай зурба устIар,
Чи лезги хва – Гьабиб стха!
Хтанвай яз гъалиб, стха!
Имам стха авай кьиле,
Машгьур хъувур Дербент къеле,
Чахъ кьегьелар мадни жеда!
Лигимардай чадни жеда!
Амма кьведра чемпион тIвар,
Къазанмишай зурба устIар,
Мад хьун патал гъалиб, стха!
Зегьмет чIугу Гьабиб стха!
Нет комментариев. Ваш будет первым!
